بھارتی بیٹرز کو نیٹ پر بھی پاکستانی بولر کا سامنا

روہت شرما ،ویرات کوہلی نے محمد عرفان جونیئر کی فاسٹ بولنگ کی تعریف کی

منگل 25 اکتوبر 2022 22:17

سڈنی (اُردو پوائنٹ اخبارتازہ ترین - این این آئی۔ 25 اکتوبر2022ء) بھارتی بیٹرز نیٹ پر پاکستانی فاسٹ بولر محمد عرفان جونیئر کا سامنا کرنے کے بعد انکی تعریف کئے بنا نہ رہ سکے۔محمد عرفان جونیئر کا بھارتی ٹیم نے سڈنی کرکٹ گرائونڈ میں نیٹ سیشننز پر سامنا کیا۔بھارتی کپتان روہت شرما اور ویرات کوہلی نے محمد عرفان جونیئر کی فاسٹ بولنگ کی تعریف کی۔

روہت شرما نے محمد عرفان جونیئر کو زیادہ بولنگ کرنے کا کہا۔بھارتی کرکٹ ٹیم کا اگلا میچ سڈنی کرکٹ گرائونڈ میں نیدر لینڈز کے خلاف ہے۔

(جاری ہے)

پاکستانی فاسٹ بولر محمد عرفان جونیئر ان دنوں سڈنی میں ہیں اور ویسٹرن سبرب ڈسٹرکٹ کی جانب سے کھیل رہے ہیں۔فرسٹ کلاس سیزن سے قبل محمد عرفان جونیئر فٹنس مسائل سے دوچار ہو گئے تھے اور فٹ ہونے کے بعد کسی ٹیم میں شامل نہ ہونے پر آسٹریلیا چلے گئے تھے۔

محمد عرفان جونیئر کا کہنا ہے کہ نیٹ پر بہت اچھی بولنگ ہوئی ہے، مکمل ردہم میں ہوں۔انہوں نے کہا کہ روہت شرما اور ویرات کوہلی نے بہت تعریف کی اچھا لگا، آج (بدھ ) بھی نیٹ سیشن میں شرکت کروں گا۔واضح رہے کہ فاسٹ بولر محمد عرفان جونیئر لاہور قلندرز کی جانب سے پاکستان سپر لیگ بھی کھیل چکے ہیں۔