Live Updates

اہم تعیناتی پر مشاورت، صدرِ مملکت سے عمران خان کی ملاقات 45 منٹ تک جاری رہی

آرمی چیف کے تقرر سے متعلق آئینی،قانونی امور زیر بحث آئے،ایوان صدر اس ضمن میں آفیشلی ہینڈ آؤٹ جاری کرے گا،تمام معاملات آئین و قانون کے مطابق ہوں گے۔پی ٹی آئی رہنما فواد چوہدری کی میڈیا سے گفتگو

Muqadas Farooq مقدس فاروق اعوان جمعرات 24 نومبر 2022 16:39

اہم تعیناتی پر مشاورت، صدرِ مملکت سے عمران خان کی ملاقات 45 منٹ تک جاری ..
اسلام آباد ( اُردو پوائنٹ ،اخبارتازہ ترین ۔ 24 نومبر 2022ء پاکستان تحریک انصاف کے رہنما فواد چوہدری نے میڈیا سے گفتگو کرتے ہوئے کہا کہ صدر مملکت عارف علوی سے عمران خان کی ملاقات 45 منٹ تک جاری رہی۔تمام پہلوؤں سے اہم تعیناتی پر مشاورت کی گئی۔آرمی چیف کے تقرر سے متعلق آئینی،قانونی امور زیر بحث آئے۔فواد چوہدری نے مزید کہا کہ صدر مملکت، عمران خان نے تمام لحاظ سے تقرری کا احاطہ کیا ہے۔

ایوان صدر اس ضمن میں آفیشلی ہینڈ آؤٹ جاری کرے گا،تمام معاملات آئین و قانون کے مطابق ہوں گے،صدر مملکت عارف علوی اسلام آباد واپس روانہ ہو گئے ہیں۔یہاں واضح رہے کہ صدر مملکت ڈاکٹر عارف علوی آج لاہور پہنچے تھے۔صدر عارف علوی نے زمان پارک میں چئیرمین پی ٹی آئی عمران خان سے ملاقات کی۔

(جاری ہے)

ملاقات میں اہم تعیناتی کا معاملہ زیر غور آیا۔صدر وزیراعظم ہاؤس سے منظور ہونے والی سمری سے متعلق عمران خان کو اعتماد میں لیا۔

عمران خان نے صدر مملکت کو کہا کہ ہماری کسی ادارے سے جنگ نہیں،آئین و قانون کے مطابق سمری دیکھیں۔ ہم نے آئین اور قانون کی پاسداری کرنی ہے۔عمران خان نے کہا کہ آئین اور قانون کے مطابق جو بنتا ہے سمری اس کے مطابق دیکھیں،اگر درست ہے تو سمری نکال دیں۔یاد رہے کہ نئے آرمی چیف اور چیئرمین جوائنٹ چیفس آف اسٹاف کمیٹی کی تقرری کی سمری ایوان صدر کو موصول ہو گئی ہے۔

صدر مملکت عارف علوی کی جانب سے سمری کی منظوری دی جائے گی۔ صدر مملکت آئین کے آرٹیکل 243 کے تحت وزیر اعظم شہباز شریف کی ایڈوائس پر منظوری دیں گے۔صدر مملکت کی منظوری کے بعد جنرل سید عاصم منیر کے آرمی چیف تعینات ہونے کا نوٹیفکیشن جاری کیا جائے گا جبکہ جنرل ساحر شمشاد مرزا کا چیئرمین جوائنٹ چیفس آف اسٹاف کمیٹی کا نوٹیفکیشن بھی جاری کیا جائے گا۔
Live عمران خان سے متعلق تازہ ترین معلومات