کراچی، ڈاؤ یونیورسٹی آف ہیلتھ سائنسز کے سامنے ایم ڈی کیٹ کے متاثرہ طلباء کا دھرنا

کراچی(اُردو پوائنٹ اخبارتازہ ترین - آن لائن۔ 24 نومبر2022ء) ڈاؤ یونیورسٹی آف ہیلتھ سائنسز کے سامنے ایم ڈی کیٹ کے متاثر ہ طلباء نے دھرنا دیا، دھرنے میں ڈاکٹر فاروق ستار بھی پہنچ گئے، وہ یونیورسٹی کا مرکزی گیٹ پھلانگ کر یونیورسٹی میں داخل ہوئے۔تفصیلات کے مطابق ایم ڈی کیٹ کے متاثرہ طلبہ و طالبات نے پلے کارڈز اٹھا کر ڈاؤ یونیورسٹی اور پی ایم سی کے خلاف دھرنا دیتے ہوئے نعرے لگائے، ڈاکٹر فاروق ستار نے بھی دھرنے میں شرکت کی اور مطالبہ کیا کہ طالب علموں کو غلط سوالات کے باعث گریس مارکس دیے جائیں۔

انھوں نے کہا ڈاؤ یونیورسٹی انتظامیہ نے سولات گوگل سرچ انجن سے اٹھا کر ٹیسٹ میں شامل کیے تھے اور 30 سے زائد سوالات آؤٹ آف سلیبس تھے۔احتجاج کی وجہ سے یونیورسٹی انتظامیہ نے یونیورسٹی کا گیٹ بند کر دیا تھا، تاہم ڈاکٹر فاروق ستار مرکزی گیٹ پھلانگ کر یونیورسٹی میں داخل ہوئے، سیکیورٹی اسٹاف بھی ڈاکٹر فاروق ستار کو داخل ہونے سے نہ روک سکا۔

(جاری ہے)

یونیورسٹی انتظامیہ نے طلبہ سے ملاقات سے انکار کر دیا تھا، مظاہرین کا کہنا تھا کہ ہمارا امتحانی پرچہ ویب سائٹ پر اپ لوڈ کیا جائے۔مظاہرین نے کہا کہ امتحانی پرچے میں متعدد کثیر الانتخابی سوالات کے آپشنز ہی غلط تھے، ہمارے مارکس بھی کم کر دیے گئے ہیں، جس کی وجہ سے متعدد طالب علموں کو فیل بھی کر دیا گیا ہے۔انھوں نے کہا ہمارے مستقبل کے ساتھ کھیلا جا رہا ہے، اور انتظامیہ بات تک کرنے کو نہیں تیار ہے، ایم ڈی کیٹ کے ٹیسٹ میں بے ضابطگیاں دیکھی گئی ہیں، بہت سے سوالات نصاب میں نہیں تھے، پی ایم سی کی جانب سی کی گئی غفلت سے جو نقصان ہوا اس کا ازالہ کون کرے گا