عدالت نے پی ٹی آئی رہنما اعظم سواتی کا چار روزہ جسمانی ریمانڈ منظور کرلیا،اعظم سواتی کی پیشی سے استثنیٰ کی درخواست بھی منظور

منگل 29 نومبر 2022 19:56

اسلام آباد (اُردو پوائنٹ اخبارتازہ ترین - آن لائن۔ 29 نومبر2022ء) سیشن کورٹ اسلام آباد نے پی ٹی آئی رہنما اعظم سواتی کے جسمانی ریمانڈ میں 3 دسمبر تک توسیع کردی۔اعظم سواتی کو عدالت میں پیش نہ کرنے کی درخواست منظور کر لی گئی۔سیشن کورٹ اسلام آباد میں اداروں کے خلاف ٹویٹ اور بیان بازی سے متعلق کیس کی سماعت ہوئی۔ ایف آئی اے کے وکیل نے استدعا کی کہ ایف آئی اے کو مزید چھ دن ریمانڈ دیا جائے۔

(جاری ہے)

وکیل ایف آئی اے نے بتایا کہ موبائل اور ٹویٹ اکاونٹ کے حوالے سے ابھی مزید تفتیش کرنی ہے۔ جسمانی ریمانڈ کی ضرورت ہے۔پی ٹی آئی رہنما اعظم سواتی کے وکیل بابر اعوان نے عدالت سے استدعا کی کہ اعظم سواتی کو سکیورٹی خدشات کے پیش نظر پیش نہ کیا جائے۔عدالت نے پیشی سے استثنیٰ کی درخواست منظور کرلی جبکہ ایف آئی اے کی استدعا منظور کرتے ہوئے اعظم سواتی کا مزید چار روزہ جسمانی ریمانڈ منظور کر لیا۔۔جج محمد بشیر نے کہا آئندہ حکم تک اعظم سواتی کو عدالت میں پیش نہ کیا جائے۔اعظم سواتی کو ویڈیو لنک کے ذریعے عدالت میں پیش کیا جائے۔