ابرار نے نام روشن کردیا، ملتان ٹیسٹ میں شاندار پرفارمنس پر سپنر کے گھر والے بھی خوشی سے نہال

کراچی (اردو پوائنٹ تازہ ترین اخبار ۔ 9 دسمبر 2022ء ) ابرار احمد کے والد نور اسلام نے کہا کہ بیٹے نے اپنی ٹیم میں سلیکشن درست ثابت کردی۔ اے آر وائی نیوز سے گفتگو کرتے ہوئے اسپنر ابرار احمد کے والد نے کہا کہ کراچی کے جہانگیر روڈ پر سپنر ابرار احمد کی رہائش گاہ پر جشن سماں ہے، چاہنے والوں سمیت رشتے داروں نے لوگوں میں میٹھائیاں تقسیم کی۔ ابرار احمد کے والد نور اسلام کا کہنا تھا کہ سپنر ابرار احمد نے ملتان ٹیسٹ یادگار بنا دیا، بہت خوش ہوں کہ ابرار نے نام روشن کردیا۔

(جاری ہے)

انہوں نے کہا کہ میں پہلے تو یہی کہتا تھا کہ ابرار تمھیں موقع کیوں نہیں ملتا لیکن اب ابرار نے اپنی ٹیم میں سلیکشن درست ثابت کردی۔ مسٹری سپنر کے بھائی شہزاد اختر کا کہنا تھا کہ ملتان ٹیسٹ میں ابرار کی شاندار پرفارمنس پر ہم سب کو فخر ہے۔ واضح رہے کہ اسپنر ابرار احمد نے ملتان میں جاری میچ میں انگلینڈ کی سات وکٹیں لی ہیں، جس کے بعد پاکستان میں ٹیسٹ ڈیبیو پر پانچ وکٹیں لینے والے 13 ویں بولر اور پہلے اسپنر بن گئے ہیں۔