افغانستان میں زیر تعلیم پاکستانی طالبات کے وفد کی وزیراعظم کے مشیر انجینئر امیر مقام سے ملاقات

جمعہ 6 جنوری 2023 23:17

اسلام آباد (اُردو پوائنٹ اخبارتازہ ترین - اے پی پی۔ 06 جنوری2023ء) افغانستان میں زیر تعلیم پاکستانی طالبات کے ایک وفد نے جمعہ کو وزیراعظم کے مشیر برائے سیاسی، عوامی امور، قومی ورثہ اور ثقافت انجینئر امیر مقام سے ملاقات کی۔ وزیر اعظم کے مشیر انجینئر امیر مقام نے افغانستان میں زیر تعلیم پاکستانی طالبات کو ہر ممکن تعاون کی یقین دہانی کرائی۔

(جاری ہے)

انجینئر امیر مقام نے افغانستان میں تعلیم جاری رکھنے سے قاصر 105 طالبات کے پاکستان میں داخلے کے لیے وزیراعظم کو خط لکھنے کی یقین دہانی بھی کرائی۔انہوں نے کہا کہ وہ اس معاملے کو وفاقی کابینہ کے آئندہ اجلاس میں بھی اٹھائیں گے۔انجینئر امیر مقام نے کہا کہ یوکرائن میں زیر تعلیم پاکستانی طلباء کو بھی اسی طرح کے مسائل کا سامنا ہے۔ انہوں نے کہا کہ وہ اس مسئلے کو حل کرنے کی بھرپور کوشش کریں گے۔اس موقع پر طلباء کے والدین بھی موجود تھے۔ طلباء اور ان کے والدین نے اس سلسلے میں کوششیں کرنے کی یقین دہانی پر وزیر اعظم کے مشیر انجینئر امیر مقام کا شکریہ ادا کیا۔