شیخ رشید ،آصف علی زرداری پر جھوٹے اور من گھڑت الزامات لگا رہے ہیں ، شرجیل انعام میمن

کراچی(اُردو پوائنٹ اخبارتازہ ترین - آن لائن۔ 27 جنوری2023ء) وزیر اطلاعات سندھ شرجیل انعام میمن نے اپنے بیان میں کہا ہے کہ شیخ رشید ،آصف علی زرداری پر جھوٹے اور من گھڑت الزامات لگا رہے ہیں ، شیخ رشید سیاسی بے یتیمی اور سیاسی بے روزگاری کا شکار ہو چکے ہیں ،شیخ رشید سی وی لیکر گھوم رہے ہیں، پاکستان پیپلز پارٹی، ن لیگ اور جے یو آئی ف نے انہیں نوکری پر رکھنے سے جواب دے دیا ہے، انہوں نے کہا کہ شیخ رشید لال حویلی سے بے دخل ہونے سے بچنے کے لیے بیہودہ الزامات لگاکر ملک میں آگ لگانے کی سازش کر رہے ہیں ، سابق صدر آصف علی زرداری نے پاکستان کھپے کا نعرہ لگا کر مشکل حالات میں ملک کو بچایا تھا ، صوبائی وزیر نے کہا کہ پی ٹی ا?ئی اور اس کے حواریوں کا دھرنے اور احتجاج کرنا مقدر بن گیا ہے ، غیر سیاسی لوگوں کو مصنوعی طریقے سے قوم پر مسلط کیا گیا تھا ، لاوارث بننے کے بعد یہ لوگ پاگل ہو چکے ہیں ، ان کو پتہ ہے کہ سہاروں کے بغیر یہ یونین کونسل کا الیکشن نہیں جیت سکتے۔

(جاری ہے)

انہوں نے کہا کہ محسن نقوی کا انتخاب الیکشن کمیشن نے آئین و قانون کے مطابق کیا ہے ، محسن نقوی اچھی شہرت کی شخصیت ہیں۔ صوبائی وزیر اطلاعات نے کہا کہ چودہری پرویز الٰہی ، فواد چوہدری کی گرفتاری کا جشن منا رہے ہیں ، پی ٹی آئی اور ان کے حواری اپنی شکست کو بھانپ کر بوکھلاہٹ میں ہر چیز کو متنازع بنانے کی سازشیں کر رہے ہیں ، یہ چاہتے ہیں کہ ان کی مرضی کے لوگ لگائے جائیں ، لگتا یہ ہے کہ عمران خان گرفتاری کے خوف سے زمان پارک کے بل میں چھپے ہوئے ہیں ،لوگوں کا باہر اجتماع جمع کر کے عمران خان سمجھتے ہیں کہ وہ چندے کے پیسوں کو ریئل اسٹیٹ میں استعمال کرنے ، منی لانڈرنگ کے گھنائونے ثبوت ، توشہ خانہ کے ڈاکوں ، بی آر ٹی اور مالم جبہ کے مقدمات سے بچ جائیں گے۔#