قانون اور عوام کی عدالت سے رجوع کریں گے، اسد عمر

اس وقت آئین خطرے میں ہے، ان لوگوں کا دستور پر عمل کرنے کا ارادہ نہیں، سیکرٹری جنرل پی ٹی آئی

اتوار 29 جنوری 2023 23:00

لاہور(اُردو پوائنٹ اخبارتازہ ترین - این این آئی۔ 29 جنوری2023ء) پاکستان تحریک انصاف کے مرکزی رہنما اسد عمر نے کہا ہے کہ پارٹی نے قانون اور عوام کی عدالت سے رجوع کرنے کا فیصلہ کیا ہے۔زمان پارک میںپارٹی کے اہم اجلاس کے بعد میڈیا بریفنگ میں اسد عمر نے کہا کہ لاہور ہائی کورٹ میںکل ہمارے کیس کی سماعت ہو گی، عدالت عالیہ نے آئین کے مطابق فیصلہ دینا ہے۔

انہوں نے کہا کہ اس وقت آئین خطرے میں ہے، ان لوگوں کا دستور پر عمل کرنے کا ارادہ نہیں، پی ٹی آئی قانون اور عوام کی عدالت سے رجوع کرے گی۔

(جاری ہے)

پی ٹی آئی کے مرکزی رہنما نے کہا کہ عمران خان کی لیڈر شپ میں عدالت کی مدد سے آئین برقرار رہے گا۔انہوںنے کہاکہ پی ٹی آئی قیادت صدر مملکت کی توجہ ایجنسیوں کی بڑھتی مداخلت کی جانب دلوانا چاہتی ہے اور زور دیتی ہے کہ بنیادی انسانی حقوق کی پامالیوں کا نوٹس لیں۔

اسد عمر نے کہا کہ پی ڈی ایم کی سرکارجس طرح سے معیشت چلا رہی ہے اس پر تشویش کا اظہار کرتے ہیں، بیروز گاری میں اضافہ ہو رہا ہے، ملک دیوالیہ پن کے قریب ہے۔انہوں نے کہا کہ پی ڈی ایم نے اقتدار میں آکر عوام کو بدترین مہنگائی دی، ہوشربا مہنگائی اور بڑھتی بیروزگاری سے ملک دیوالیہ پن کی دہلیز پر آکھڑا ہوا ہے۔