سعودی عرب صاف توانائی کے شعبے میں266 ارب ڈالر کی سرمایہ کاری کرے گا،وزیرتوانائی

اس منصوبے کا حتمی مقصد دنیا کو توانائی برآمد کرنااور صاف ہائیڈروجن پیدا کرنا ہے،شہزادہ عبدالعزیز

منگل 31 جنوری 2023 15:47

سعودی عرب صاف توانائی کے شعبے میں266 ارب ڈالر کی سرمایہ کاری کرے گا،وزیرتوانائی
ریاض(اُردو پوائنٹ اخبارتازہ ترین - این این آئی۔ 31 جنوری2023ء) سعودی وزیرتوانائی شہزادہ عبدالعزیز بن سلمان نے کہا ہے کہ سعودی عرب صاف توانائی پیدا کرنے، ٹرانسپورٹ لائنوں اور تقسیم کے مزید نیٹ ورکس کو شامل کرنے کے لیے 10 کھرب ریال کی سرمایہ کاری کرے گا۔غیرملکی خبررساں ادارے کے مطابق انھوں نے ایک بیان میں کہا کہ اس منصوبے کا حتمی مقصد دنیا کو توانائی برآمد کرنااور صاف ہائیڈروجن پیدا کرنا ہے۔

(جاری ہے)

انھوں نے کہا کہ ہم ہائیڈروجن کے معروف برآمد کنندہ بننے کے ساتھ ساتھ بھاری صنعتوں میں مقامی استعمال کی غرض سے صاف ہائیڈروجن مہیا کرنے کے لیے پرعزم ہیں تاکہ سبز مصنوعات جیسے گرین سٹیل، گرین ایلومینیم، کھاد اور دیگرمصنوعات مسابقتی قیمتوں پرتیارکی جا سکیں۔وزیرتوانائی نے تیل اورگیس کی ترسیل میں نمایاں اضافے اور مرکزی گیس نیٹ ورک کو دگنا کرنے کے لیے جاری کام پر بھی زور دیا۔انھوں نے پیٹروکیمیکلزکے خام مال میں اضافے کے لیے مائع سے کیمیکل کی تبدیلی کی تنصیبات کیکام کی رفتار پر بھی روشنی ڈالی۔