فیصل آباد میں گیارہواں سالانہ قومی کچن گارڈننگ میلہ اتوار کومنعقد ہوگا

فیصل آباد (اُردو پوائنٹ اخبارتازہ ترین - اے پی پی۔ 02 فروری2023ء) ایگری ٹور ازم ڈویلپمنٹ کارپوریشن کے زیر اہتمام گیارہواں سالانہ قومی کچن گارڈننگ میلہ 5فروری کوبیسٹ گارڈن نرسری فارمرمال گٹ والافیصل آباد میں منعقد ہوگاجس میں کچن گارڈننگ کی اہمیت کو اجاگر کرنے کیلئے مختلف پروگرامز ہوں گے۔ فیسٹیول کے انتظامات کو حتمی شکل دینے کیلئے ایگری ٹورازم اور فیسٹیول بارے فیصل آباد چیمبر آف کامرس اینڈانڈسٹری کی قائمہ کمیٹیوں کے مشترکہ اجلاس میں چیئرمین میلہ فیسٹیول سید خالد محمود اور چیئرمین ایگری ٹورازم محمد طارق تنویر نے بتایا کہ اس میلے کا مقصد نوجوان نسل کو پنجاب کی دیہی ثقافت اور زراعت کی اہمیت سے آگاہ کرنا ہے۔

انہوں نے بتایا کہ میلے کے دوران کچن گارڈننگ کے حوالے سے مختلف سٹالز لگائے جائیں گے جبکہ سٹال لگانے والوں کے درمیان مقابلہ بھی ہوگااورتین بہترین سٹالز لگانے والوں کو انعام بھی دیئے جائیں گے۔

(جاری ہے)

انہوں نے بتایا کہ میلے کو یوم یکجہتی کشمیر کے موقع پر منعقد کرنے کا مقصد یہ ہے کہ شرکا کو کشمیر ی بھائیوں کی جدوجہد اور قربانیوں سے آگاہ کیا جائے جو گزشتہ 7دہائیوں سے آزادی کی جدوجہد کر رہے ہیں۔

انہوں نے گھریلو پیمانے پر سبزیوں کی کاشت اور ان کی افادیت کے بارے میں بتایا کہ گھروں میں سبزیوں کی کاشت کو کچن گارڈننگ کہا جاتا ہے جو آلودہ پانی،کیمیائی کھاد اور کیٹرے مار ادویات سے پاک اور اپنی غذائی و طبی افادیت سے بھرپور ہوتی ہیں۔انہوں نے بتایا کہ ان سبزیوں میں تمام ضروری اجزا مثلا حیاتین،نشاشتہ،لحمیات اور نمکیات دیگر بازاری سبزیوں کی نسبت زیادہ ہوتے ہیں کیونکہ یہ کیمیکل اور سپرے وغیرہ سے پاک ہوتی ہیں۔

انہوں نے بتایا کہ خواتین گھر داری کے ساتھ ساتھ کچن گارڈننگ پر بھر پور توجہ دے سکتی ہیں اور یہ ایک بہترین مشغلہ بھی ہے۔انہوں نے بتایا کہ گھریلو پیمانے پر سبزیوں کی کاشت کرنے کے خواشمند زرعی ماہرین کے مشورے اور زرعی لٹریچر کی مدد سے ان کی کاشت کرسکتے ہیں جو نہایت ہی آسان ہے۔ انہوں نے بتایا کہ موسم سرما میں پھول گوبھی،بند گوبھی،آلو پیاز،سلاد،مٹر،مولی،شلجم،گاجر پالک،میتھی، ساگ،دھنیہ، شکر قندی اور چقندر جبکہ موسم گرما میں مرچ، شملہ مرچ،ٹماٹر، کھیرا،کریلا، بینگن، بھنڈی،گھیاتوری،ٹینڈا آلو وغیرہ گھریلو سطح پر اگائے جا سکتے ہیں اور سبزیوں کی پنیری اور بیج بازار سے بآسانی مل جاتے ہیں جبکہ سبزیوں کی پنیری گھر پر بھی تیار کی جاسکتی ہے۔

انہوں نے بتایا کہ کچن گارڈننگ کیلئے ایسی جگہ کا انتخاب کرنا چاہیے جہاں کم از کم 5گھنٹے دھوپ رہتی ہو۔ انہوں نے بتایا کہ سبزیوں کو زمین کے علاوہ گملوں میں بھی کاشت کیا جا سکتاہے۔