کرکٹ کے میدان میں سُسر نے داماد کو چھکا جڑ دیا

لاہور (اردو پوائنٹ تازہ ترین اخبار ۔ 2 فروری 2023ء ) کرکٹ کے میدان میں سُسر نے داماد کو چھکا جڑ دیا۔ سابق آل راؤنڈر شاہد آفریدی نے لیفٹ آرم فاسٹ بولر شاہین شاہ آفریدی کی گیند پر چھکا لگا دیا۔ پاکستان کرکٹ ٹیم کے سابق کپتان شاہد آفریدی سے زوردار اسٹروک کھانے کے بعد فاسٹ بولر شاہین آفریدی نے کہا کہ آپ کے ساتھ کھیلنا اچھا لگتا ہے مگر یہ آؤٹ تھا۔

شاہد آفریدی نے کہا کہ شاہین فارم میں لگ رہے ہیں مگر میں نے اُن کو چھکا جڑ دیا۔ یاد رہے کہ فاسٹ بولر شاہین آفریدی سابق کپتان شاہد آفریدی کی دوسری بڑی بیٹی انشا آفریدی کے ساتھ شادی کے بندھن میں بندھنے کے لیے کراچی پہنچ گئے ہیں۔ بائیں ہاتھ کے پیسر بھی ان کے اہل خانہ کے ساتھ ہیں۔ اطلاعات کے مطابق شاہین اور انشا کا نکاح 3 فروری بروز جمعہ کو ہوگا۔

(جاری ہے)

تقریب میں پاکستان کرکٹ کے ستارے اور لیجنڈز شرکت کریں گے۔ چونکہ انشا آفریدی ڈاکٹر بن رہی ہیں اس لیے شادی کی بقیہ رسومات ان کی گریجویشن کے بعد ہوں گی۔ پچھلے سال دسمبر میں شاہین اور انشا کی شادی کی تاریخ نے انٹرنیٹ پر دھوم مچا دی تھی۔ دسمبر 2022ء کے آخری ہفتے میں سابق عبوری چیف سلیکٹر کے گھر میں شادی کی گھنٹیاں بجنے لگیں جب شاہد آفریدی کی سب سے بڑی بیٹی اقصیٰ آفریدی نے نصیر ناصر خان سے شادی کی۔

اس وقت قومی ٹیم میں شادیوں کا سیزن چل رہا ہے۔ تیز گیند باز حارث رؤف نے شادی کی تقریبات کا آغاز کیا جب وہ دسمبر 2022ء میں مزنا مسعود ملک کے ساتھ شادی کے بندھن میں بندھ گئے۔ بائیں ہاتھ کے بلے باز شان مسعود نے جنوری میں نشے خان سے شادی کی۔ اسی ماہ سٹار آل راؤنڈر شاداب خان نے سب کو حیران کر دیا کیونکہ انہوں نے اعلان کیا کہ انہوں نے لیجنڈ سپنر ثقلین مشتاق کی بیٹی سے نکاح کرلیا ہے۔ شاداب خان کی شادی کی باقی تقریبات شاہین کے نکاح کے چند دن بعد 9 اور 10 فروری کو ہوں گی۔ دریں اثناء حارث کی شادی کی تقریب بھی اس سال ہونے کی امید ہے۔