لاہور چیمبر نے چارٹر آف اکانومی کے لیے سیاسی جماعتوں کے سربراہان کو خط لکھ دیا

جمعرات 2 فروری 2023 23:44

لاہور (اُردو پوائنٹ اخبارتازہ ترین - این این آئی۔ 02 فروری2023ء) لاہور چیمبر آف کامرس اینڈ انڈسٹری کے صدر کاشف انور نے پاکستان کی تمام سیاسی جماعتوں بشمول پاکستان پیپلز پارٹی، پی ایم ایل این، پی ٹی آئی، جے یو آئی، جے آئی، اے این پی اور دیگر کے سربراہان کو خط لکھا ہے کہ وہ چارٹر آف اکانومی کے لیے مل بیٹھیں۔ خط میں کہا گیا ہے کہ پاکستان کو سخت اور کثیر جہتی اقتصادی چیلنجوں کا سامنا ہے اور لاہور چیمبر ایک اہم کاروباری معاون ادارہ ہے، جو سمجھتا ہے کہ کہ اقتصادی پالیسیوں میں تسلسل موجودہ چیلنجوں سے نمٹنے اور پائیدار اقتصادی ترقی کے لیے بہت ضروری ہے۔

(جاری ہے)

انہوں نے کہا ہے کہ لاہور چیمبر موجودہ معاشی چیلنجز سے بخوبی آگاہ ہے اور ایک چارٹر آف اکانومی تشکیل دینے کے عمل میں ہے جسے سیاسی قیادت کے ساتھ شیئر کیا جائے گا۔ لاہور چیمبر کے صدر نے کہا کہ یہ چارٹر آف اکانومی اقتصادی حکمرانی کے ایجنڈے پر اتفاق رائے پیدا کرنے میں مدد کرے گا جس پر سیاسی جماعتیں اپنے اپنے منشور کے حصے کے طور پر عمل کر سکتی ہیں۔انہوں نے زور دیا کہ سیاسی جماعتوں کے متعلقہ رہنما مذکورہ سیاسی جماعت کے معاشی ایجنڈے کو ایل سی سی آئی کے ساتھ شیئر کریں تاکہ اسے ایک متفقہ چارٹر آف اکانومی بنانے کے لیے بھی شامل کیا جاسکے۔