امارات میں رہائشیوں کی گھر بیٹھے سرکاری خدمات تک آسان رسائی

ابوظہبی ( اُردو پوائنٹ اخبارتازہ ترین ۔ 07 فروری 2023ء ) متحدہ عرب امارات میں رہائشیوں کی سرکاری خدمات تک آسان رسائی کے لیے حکام نے سمارٹ فون میں 2 اپیلی کیشنز ڈاؤن لوڈ کرکے گھر بیٹھے مختلف خدمات سےمستفید ہونے کا مشورہ دے دیا۔ خلیج ٹائمز کے مطابق یو اے ای کے رہائشیوں کو مشورہ دیا جاتا ہے کہ وہ UAEICP ایپ اور UAE PASS کو خدمات تک آسان رسائی کے لیے اپنے سمارٹ فون میں ڈاؤن لوڈ کریں، خاص طور پر اگر انہیں مختلف سرکاری محکموں میں کوئی کام ہے، سفر کرنا چاہتے ہیں یا ڈیجیٹل دستخط کی ضرورت ہے۔

بتایا گیا ہے کہ UAE PASS شہریوں اور رہائشیوں کے لیے پہلی محفوظ قومی ڈیجیٹل شناخت ہے، جو انہیں مختلف شعبوں میں بہت سی آن لائن خدمات تک رسائی حاصل کرنے، دستاویزات پر دستخط اور تصدیق کرنے کے ساتھ ڈیجیٹل طور پر لین دین کرنے، اپنے سرکاری دستاویزات کے ڈیجیٹل ورژن کی درخواست کرنے،  دوسری خدمات کی درخواست کرنے اور سرکاری دستاویزات کو استعمال کرنے کے قابل بناتا ہے۔

(جاری ہے)

اس کے علاوہ شناخت و قومیت، کسٹمز اور پورٹس سکیورٹی کے لیے وفاقی اتھارٹی (ICP) نے تمام افراد سے UAEICP ایپلی کیشن ڈاؤن لوڈ کرنے اور پیش کردہ مختلف خدمات سے مستفید ہونے کا مشورہ دیا ہے، اس کے ذریعے کسی رشتہ دار یا دوست کے لیے وزٹ ویزا کی درخواست بھی کی جاسکتی ہے۔