سکھر شہر میں ٹریفک جام کا مسئلہ حل نہ ہو سکا،رشوت کے عوض دن میں بھی بڑی گاڑیوں کا داخلہ ، ٹریفک جام معمول بن گیا

پیر 12 مئی 2025 19:45

سکھر (اُردو پوائنٹ اخبارتازہ ترین - این این آئی۔ 12 مئی2025ء)سکھر شہر میں ٹریفک جام کا مسئلہ حل نہ ہو سکا،رشوت کے عوض دن میں بھی بڑی گاڑیوں کا داخلہ ، ٹریفک جام معمول بن گیا،مسافر گاڑیوں سمیت عام شہریوں کو تکلیف کا سامنا تفصیلا ت کے مطابق سکھر میں کئی برس سے ٹریفک جام کا مسئلہ اب تک حل نہیں ہو سکا ہے ، ٹریفک جام رہنا معمول بن چکا ہے ، جس کے باعث جہاں مسافر گاڑیوں کو پریشانی کا سامنا ہے وہیں شہریوں کوبھی آمد و رفت میں شدید مشکلات ہیں۔

(جاری ہے)

تجارتی و کاروباری مراکز، اہم شاہراہوں سمیت سکھر کے مصروف ترین تجارتی مراکز اور مارکیٹوں میں دکانوں کے باہر قائم تجاوزات، سامان اور غلط پار کنگ کی وجہ سے صبح اور شام کے اوقات میں کئی گھنٹے تک ٹریفک جام رہتا ہے تو دوسری جانب ٹریفک پولیس رشوت کے عیوض پابندی کے باوجود بڑی گاڑیوں کو شہر میں داخلے کی اجازت دیتی ہے جس کی وجہ سے ٹریفک جام میں مزید اضافہ ہو جاتا ہے ، سکھر انتظامیہ بالخصوص پولیس نے ٹریفک مسائل کے حل کیلئے ٹریفک فورس میں اضافی نفری بھی تعینات کی لیکن افسوس شہر کی مختلف شاہراں پر ٹریفک اہلکاربھی گاڑیوں کی روانی برقرار رکھنے میں ناکام دکھائی دیتے ہیں جبکہ کئی مقامات پر تو ٹریفک اہلکار تعینات ہی نہیںہے جس کی وجہ سے شہریوں کو ٹریفک جام کے مسائل سے گذرنا پڑ رہا ہے، سندھ کے تیسرے بڑے شہر سکھر میں ٹریفک کے بڑھتے مسائل پر شہری و سماجی حلقوں نے تشویش کا اظہار کرتے ہوئے حکام بالا سے اپیل کی ہے کہ ٹریفک جام کے مسائل کے حل کیلئے موثر پالیسی بنا کر شہریوں کو درپش مشکلات سے نجات دلائی جائے۔