خواتین کرکٹ سیزن 2025-26کا کیلنڈر جاری

لاہور (اُردو پوائنٹ اخبارتازہ ترین - این این آئی۔ 18 جولائی2025ء) خواتین کرکٹ سیزن 2025-26کا کیلنڈر جاری کر دیا گیا ۔قومی وویمنز ٹیم اگست میں آئرلینڈ جائے گی جہاں آئرلینڈ کے خلاف تین ٹی ٹونٹی انٹرنیشنل میچز کھیلے گی، جنوبی افریقہ وویمنز ٹیم ستمبر میں پاکستان کا دورہ کرے گی، لاہور میں تین ون ڈے انٹرنیشنل میچز 16سے 22ستمبر تک کھیلے جائیں گے۔

وویمنز ورلڈ کپ 30ستمبر سے دو نومبر تک کھیلا جائے گا، پاکستان وویمنز ٹیم اپنے میچز سری لنکا میں کھیلے گی۔پاکستان وویمنز ٹیم 7فروری سے 2مارچ 2026ء تک جنوبی افریقہ کا دورہ کرے گی۔دورہ جنوبی افریقہ میں تین ون ڈے انٹرنیشنل اور تین ٹی ٹونٹی انٹرنیشنل میچز شامل ہیں ۔ اپریل 2026ء میں زمبابوے وویمنز کرکٹ ٹیم پاکستان کا دورہ کرے گی،زمبابوے کے خلاف سیریز 24اپریل سے 11مئی تک کھیلی جائے گی،سیریز میں تین ون ڈے انٹرنیشنل اور تین ٹی ٹونٹی انٹرنیشنل میچز شامل ہیں ۔

(جاری ہے)

وویمنز ٹی ٹونٹی ورلڈ کپ 12جون سے 5جولائی تک انگلینڈ میں شیڈول ہے ، ٹی ٹونٹی ورلڈ کپ سے پہلے پاکستان کرکٹ ٹیم آئرلینڈ میں تین ملکی ٹی ٹونٹی سیریز کھیلے گی۔ تین ملکی ٹی ٹونٹی سیریز میں پاکستان اور ویسٹ انڈیز کی کرکٹ ٹیمیں شریک ہوں گی۔پاکستان انڈر 19وویمنز ٹیم اس سال دسمبر میں بنگلہ دیش کا دورہ کرے گی۔بنگلہ دیش کے دورے پر پانچ ٹی ٹونٹی میچز کھیلے گی۔

نیشنل وویمنز ون ڈے ٹورنامنٹ 6سے 24نومبر تک کراچی میں ہوگا۔نیشنل وویمنز ٹی ٹونٹی ٹورنامنٹ 24 مارچ سے 17اپریل 2026ء تک کراچی میں ہوگا۔دونوں قومی ٹورنامنٹس ڈبل لیگ فارمیٹ پر کھیلے جائیں گے۔خواتین انڈر 19ٹی ٹونٹی ٹورنامنٹ 15ستمبر سے 6 اکتوبر تک کراچی میں ہوگا۔اس سال اکتوبر میں خواتین کا انٹر یونیورسٹی کرکٹ ٹورنامنٹ بھی شیڈول ہیں ۔ہیڈ آف وومز کرکٹ رافیہ حیدر نے بتایا کہ 2025-26 کا شیڈول کھلاڑیوں کو کھیلنے کے اچھے مواقع دے گا، نوجوان کھلاڑیوں کو آگے لانے کیلئے پاتھ ویز پروگرام مضبوط ہو رہا ہے، انڈر 19 ٹورنامنٹ اور بنگلہ دیش کا دورہ نوجوانوں کیلئے بڑا موقع ہے، نیا سیزن اہم ہے،دو ورلڈ کپ جیسے بڑے ایونٹس سامنے ہیں، اچھے حریفوں کے خلاف کھیلنے سے کھلاڑیوں کی کارکردگی بہتر ہوگی، خواتین کرکٹ میں ڈیپارٹمنٹس کا ٹورنامنٹ شامل کرنے پر بات چیت جاری ہے۔