ورلڈ چیمپئن شپ آف لیجنڈز 2025 ،پاکستان چیمپئنز نے انگلینڈ کو سنسنی خیز مقابلے کے بعد 5 رنز سے ہرا دیا

ہفتہ 19 جولائی 2025 09:30

برمنگھم (اُردو پوائنٹ اخبارتازہ ترین - اے پی پی۔ 19 جولائی2025ء) انگلینڈ میں جاری ورلڈ چیمپئن شپ آف لیجنڈز 2025 کے افتتاحی میچ میں پاکستان چیمپئنز نے انگلینڈ چیمپئنز کو سنسنی خیز مقابلے کے بعد 5 رنز سے ہرا دیا۔ میچ کا آغاز انگلینڈ چیمپئنز کے ٹاس جیتنے سے ہوا جنہوں نے پاکستان چیمپئنز کو بیٹنگ کی دعوت دی۔ پاکستان نے ابتدا میں مشکلات کے باوجود مقررہ 20 اوورز میں 9 وکٹوں کے نقصان پر 160 رنز بنائے۔

اوپننگ بیٹر شرجیل خان 12 رنز بنا کر جلد آؤٹ ہو گئے جبکہ کامران اکمل بھی 8 رنز پر پویلین لوٹ گئے۔ اس موقع پر کپتان محمد حفیظ نے ذمہ داری سے کھیلتے ہوئے 34 گیندوں پر 54 رنز کی شاندار اننگز کھیلی جس میں 8 خوبصورت چوکے شامل تھے۔ آخری اوورز میں عامر یامین نے صرف 13 گیندوں پر جارحانہ 27 رنز بنائے جن میں 3 چھکے شامل تھے۔

(جاری ہے)

161 رنز کے ہدف کے تعاقب میں انگلینڈ چیمپئنز کی ٹیم مقررہ اوورز میں 3 وکٹوں کے نقصان پر 155 رنز بنا سکی۔

فل مسٹرڈ نے 58 رنز کی اننگز کھیلی جبکہ ای این بیل نے ناقابل شکست 51 رنز بنائے۔ پاکستان کی جانب سے رومان رئیس، عامر یامین اور سہیل تنویر نے ایک ایک وکٹ حاصل کی اور اپنی ٹیم کو فتح دلانے میں اہم کردار ادا کیا۔ محمد حفیظ کو میچ کا بہترین کھلاڑی قرار دیا گیا۔ یہ فتح پاکستان چیمپئنز کے لیے ایک مثبت آغاز ہے اور ٹیم کی کارکردگی نے شائقین کرکٹ کے دل جیت لیے ہیں۔\932