وزیراعلیٰ پنجاب کی ہدایات پر سی ایم فری وائی فائی سروس کا دائرہ کار مزید بڑھا دیا گیا

ہفتہ 19 جولائی 2025 13:52

لاہور (اُردو پوائنٹ اخبارتازہ ترین - این این آئی۔ 19 جولائی2025ء) وزیراعلیٰ پنجاب کی ہدایات پر سی ایم فری وائی فائی سروس کا دائرہ کار مزید بڑھا دیا گیا،لاہور میں 230سے بڑھا کر 430مقامات پر فری وائی فائی سروس فراہم کر دی گئی۔ ترجمان سیف سٹیز کے مطابق سیف سٹی کی جانب سے مفت انٹرنیٹ سروس کو پنجاب کے 11اضلاع سے بڑھا کر 22اضلاع تک فعال کر دیا گیا، پنجاب کے 22اضلاع میں 710مقامات پر مفت وائی فائی سروس فراہم کی جا رہی ہے، لاہور، قصور، ناننکانہ صاحب، شیخوپورہ، سیالکوٹ، گجرات، جہلم، اٹک ،حسن ابدال ، ساہیوال، اوکاڑہ اور مری کے اہم مقامات پر بھی مفت وائی فائی سروس دستیاب ہے۔

ترجمان نے کہا کہ فری وائی فائی سروس کو جدید ٹیکنالوجی وائی فائی 6پر منتقل کردیا گیا، وائی فائی 6ٹیکنالوجی کی بدولت صارفین کو مزید تیز انٹرنیٹ کی فراہمی ممکن ہو سکے گی، فری وائی فائی سروس کا دائرہ کار جلد پنجاب بھر تک پھیلایا جائیگا۔

(جاری ہے)

ترجمان سیف سٹیز نے مزید کہا کہ اب تک 37.22ملین سے زائد صارفین نے 905ٹی بی ڈیٹا استعمال کیا، شہری مفت وائی فائی سروس سے استفادہ کرتے ہوئے اپنی روزمرہ کی سرگرمیوں کو مزید آسان بنا رہے ہیں، وزیر اعلی پنجاب کے احکامات پر پنجاب کو جدید ڈیجیٹل صوبہ بنایا جا رہا ہے،فری وائی فائی سروس ایمرجنسی استعمال کے لیے ہے، ویڈیو سٹریمنگ یا تفریح کے لیے نہیں۔