پاکستان اسپورٹس بورڈ نے فیڈریشنز کو دیے جانیوالے فنڈز کی تفصیلات جاری کردیں

ہفتہ 19 جولائی 2025 22:30

اسلام آباد (اُردو پوائنٹ اخبارتازہ ترین - این این آئی۔ 19 جولائی2025ء)پاکستان اسپورٹس بورڈ نے فیڈریشنز کو دیے جانے والے فنڈز کی تفصیلات ویب سائٹ پر جاری کردیں۔ذرائع کے مطابق پی ایس بی نے مالی سال 25-2024میں 23 فیڈریشنز کو 10 کروڑ سے زائد کے فنڈز دیے اور 7 فیڈریشنز کو سالانہ گرانٹ کے بجائے صرف اسپیشل گرانٹ دی گئی۔ذرائع کے مطابق اسپورٹس بورڈ نے پاکستان ہاکی فیڈریشن کو گزشتہ مالی سال میں 3کروڑ سے زائد کی رقم دی تھی اور پی ایچ ایف کو 30,921,500 روپے اسپیشل گرانٹس کی مد میں ملے، ہاکی فیڈریشن کو مختص 3 کروڑ میں سے 70 لاکھ روپے پی سی بی نے براہ راست ٹریول ایجنٹ کو پلیئرز کی ٹکٹ کے دیے تھے، نئے مالی سال میں پی ایس بی ہاکی فیڈریشن کو پیسے دینے کے بجائے براہ راست وینڈر کو ادائیگی کرے گا۔

ذرائع نے بتایا کہ ایتھلیٹکس فیڈریشن کو ایک کروڑ 41 لاکھ 75 ہزار اسپیشل گرانٹ کی مد میں ملے، ایتھلیٹکس فیڈریشن کو دی جانیوالی گرانٹ میں سے ایک کروڑ صرف ارشد ندیم کی تربیت کیلئے مختص تھا۔

(جاری ہے)

ذرائع نے بتایا کہ نیشنل رائفل ایسوسی ایشن کو 20 لاکھ کی سالانہ اور 50 لاکھ کی خصوصی گرانٹ دی گئی جب کہ والی بال، اسکواش اور ہینڈبال فیڈریشن کو 50، 50 لاکھ روپے کی گرانٹس ملیں۔

اس کے علاوہ الپائن کلب کو 41 لاکھ، پاکستان ٹینس فیڈریشن کو 32 لاکھ 50 ہزار، پاکستان کبڈی اور پاکستان ریسلنگ فیڈریشن کو 30، 30 لاکھ، باڈی بلڈنگ، ٹین پن فیڈریشن کو 50،50 لاکھ اور ٹیبل ٹینس کو 22 لاکھ 50 ہزار روپے ملے۔اسپورٹس بورڈ نے ونٹر اسپورٹس، جو جٹسو فیڈریشن کو 20, 20 لاکھ، بیڈمنٹن ، رگبی اور تائیکوانڈو کو 11، 11 لاکھ روپے کی فنڈنگ کی۔اس کے علاوہ جوڈو ، سیلنگ اور وشو فیڈریشن کو 10، 10 لاکھ روپے کے فنڈز ملے جب کہ پاکستان بلیئرڈز اینڈ اسنوکر ایسوسی ایشن کو بھی 10 لاکھ کی گرانٹ ملی۔