پہلا ٹی ٹونٹی؛ بنگلہ دیش نے پاکستان کو با آسانی شکست دیدی

تین میچز کی ٹی ٹونٹی سیریز کے پہلے مقابلے میں پاکستان نے بنگلہ دیش کو جیت کے لیے 111 رنز کا ہدف دیا تھا

ساجد علی اتوار 20 جولائی 2025 20:24

پہلا ٹی ٹونٹی؛ بنگلہ دیش نے پاکستان کو با آسانی شکست دیدی

ڈھاکہ ( اُردو پوائنٹ اخبارتازہ ترین۔ 20 جولائی 2025ء ) پہلے ٹی ٹونٹی میں میں بنگلہ دیش نے پاکستان کو با آسانی شکست دیدی۔

تفصیلات کے مطابق ڈھاکہ کے شیر بنگلہ سٹیڈیم میں کھیلے جانے والے میچ میں بنگلہ دیشی کپتان لٹن داس نے ٹاس جیت کر پہلے فیلڈنگ کا فیصلہ کیا۔

پہلے کھیلتے ہوئے پاکستانی بیٹنگ لائن بری طرح ناکام ہوئی اور پوری ٹیم 110 رنز پر آؤٹ ہوگئی، پاکستان کی جانب سے فخر زمان کے علاوہ کوئی بلے باز وکٹ پر زیادہ دیر نہ ٹھہر سکا انہوں نے سب سے زیادہ 44 رنز بنائے۔

آل راؤنڈر عباس آفریدی نے تین چھکوں کی مدد سے 22 رنز اسکور کیے اور خوشدل شاہ نے 17 رنز بنائے۔

بنگلہ دیش کی جانب سے تسکین احمد نے 3 اور مستفیض الرحمان نے 2 کھلاڑیوں کو آؤٹ کیا۔

تین میچز کی ٹی ٹونٹی سیریز کے پہلے مقابلے میں پاکستان نے بنگلہ دیش کو جیت کے لیے 111 رنز کا ہدف دیا جو میزبان ٹیم نے آسانی سے صرف 3 وکٹوں کے نقصان پر پورا کرلیا۔

(جاری ہے)

بنگلہ دیش کے پرویز حسین نے ناٹ آؤٹ 56 رنز بنائے، توحید ہریدوئے 36 بناکر دوسرے نمایاں بلے باز رہے۔

پاکستان کی جانب سے سلمان مرزا نے 2 اور عباس آفریدی نے ایک وکٹ حاصل کی۔

پاکستان کی ٹیم میں فخر زمان، صائم ایوب، محمد حارث، حسن نواز، سلمان علی آغا (کپتان)، محمد نواز، خشدل شاہ، فہیم اشرف، عباس آفریدی، سلمان مرزا اور ابرار احمد شامل تھے۔

بنگلہ دیش کی ٹیم پرویز حسین، لٹن داس (کپتان)، شمیم حسین، تنظیم حسن سمیت دیگر کھلاڑیوں پر مشتمل تھی۔

ٹاس پر پاکستانی کپتان سلمان علی آغا نے کہا کہ بنگلہ دیش ہوم گراؤنڈ اور اپنی کنڈیشنز میں اچھی ٹیم ہے، ہم بھی اگر ٹاس جیتتے تو پہلے فیلڈنگ ہی کرتے، ٹیم نے کراچی میں کیمپ کے دوران اچھی تیاری کی ہے۔

بنگلہ دیش ٹیم کے کپتان لٹن داس کا کہنا تھا کہ بنگلہ دیشی ٹیم بہت متوازن ہے۔