یو اے ای میں روزگار کے خواہشمندوں کیلئے خوشخبری

دبئی ( اُردو پوائنٹ اخبارتازہ ترین۔ 22 جولائی 2025ء ) متحدہ عرب امارات میں روزگار کے خواہشمندوں کیلئے خوشخبری ہے کہ خلیجی ملک کے معروف ایمریٹس گروپ نے 17 ہزار سے زائد نئے ملازمین کی بھرتی شروع کردی۔ سرکاری خبرساں ادارے وام کے مطابق ایمریٹس گروپ نے اپنے ترقی کے سفر کے ایک نئے مرحلے کے حصے کے طور پر عالمی ٹیلنٹ کے حصول اور بھرتی کی نئی مہم کا آغاز کیا ہے، گروپ کا مقصد رواں مالی سال کے دوران ایمریٹس ایئرلائن اور دناتا کے ایوی ایشن اور ٹریول سروسز کے کاروبار کے اندر کام کے مختلف شعبوں پر محیط 350 متنوع کرداروں میں مجموعی طور پر 17 ہزار 300 نئے ملازمین کو بھرتی کرنا ہے۔

بتایا گیا ہے کہ ایمریٹس گروپ کیبن کریو، پائلٹ، انجینئرز، سیلز اور مارکیٹنگ ٹیموں، کسٹمر سروس، گراؤنڈ ہینڈلنگ، کیٹرنگ، آئی ٹی، انسانی وسائل اور فنانس جیسے کرداروں کے لیے نئے امیدواروں کو تلاش کر رہا ہے، دناتا کارگو، کیٹرنگ اور گراؤنڈ ہینڈلنگ کی خدمات میں 4 ہزار سے زیادہ ماہرین کو بھرتی کرنے کی کوششیں جاری ہیں، جس کے لیے اس سال یہ گروپ دنیا بھر کے 150 شہروں میں 2 ہزار 100 سے زیادہ بھرتی ایونٹس اور اوپن ڈے منعقد کرے گا۔

(جاری ہے)

منتظمین کو امید ہے کہ وہ ان ایونٹس کے ذریعے بہترین پائلٹس، آئی ٹی ماہرین، انجینئرز اور کیبن کریو کو راغب کرنے میں کامیاب ہوں گے، اماراتی طلباء اور گریجویٹس کو اپنی طرف متوجہ کرنے کے لیے ایونٹس میں دبئی میں اوپن ڈے بھی شامل ہوں گے، یہ ایونٹس گروپ میں شامل ہونے میں دلچسپی رکھنے والوں کے لیے بھرتی کے ماہرین سے ملنے، موجودہ ملازمین کے ساتھ بات چیت کرنے اور ان کے کامیاب تجربات کے بارے میں جاننے کے لیے ایک قیمتی موقع ہوں گے۔

معلوم ہوا ہے کہ 2022ء سے اب تک گروپ نے 41 ہزار سے زیادہ افراد کو ملازمت دی ہے، جن میں تقریباً 27 ہزار آپریشنل رولز شامل ہیں جس سے اس کی کل افرادی قوت تقریباً 1 لاکھ 21 ہزار ہوچکی ہے، چیئرمین اور ایمریٹس ایئرلائن و گروپ کے چیف ایگزیکٹو شیخ احمد بن سعید آل مکتوم نے کہا ہے کہ ’ایمریٹس گروپ کی انسانی وسائل کی حکمت عملی دبئی اکنامک ایجنڈا (D33) کے مقاصد اور اس کے ترقی و توسیعی منصوبوں پر مبنی ہے، جس میں گروپ کی حمایت کرنے کے لیے عالمی ٹیلنٹ کی تلاش اور مستقبل کے لیے اس کے عزم و ہمت کے عزم کو جاری رکھا گیا ہے۔

بتایا جارہا ہے کہ دبئی کی جاب مارکیٹ اپنی سکیورٹی و استحکام، اقتصادی مواقع، جدید ٹیکنالوجی کے نظام، آگے کی سوچ کی پالیسیوں اور متحرک طرز زندگی کی بدولت دنیا بھر کے ٹیلنٹ کو راغب کرتی ہے اور ایمریٹس گروپ ایک سرکردہ ٹیلنٹ میگنیٹ ہے، صرف گزشتہ مالی سال میں گروپ کو اپنے مختلف برانڈز اور ڈویژنز میں 3.7 ملین سے زیادہ ملازمت کی درخواستیں موصول ہوئیں جو اس کے مضبوط برانڈ، عالمی حیثیت، ملازمین پر مرکوز حکمت عملی، ٹیکس فری تنخواہ، اعلیٰ مراعات و شاندار تربیت، ترقی اور شناختی پروگراموں کی وجہ سے ہے۔