وزیر اعلی خیبرپختونخو کی زیر صدارت اجلاس، احساس فلیگ شپ انیشیٹو کے تحت مختلف فلاحی پروگراموں پر پیشرفت کا جائزہ لیا گیا ، احساس پروگراموں کے فنڈز بڑھا کر 8 ارب کرنے کا اعلان

پشاور (اُردو پوائنٹ اخبارتازہ ترین - اے پی پی۔ 22 جولائی2025ء) وزیر اعلی خیبرپختونخوا علی امین خان گنڈاپور کے زیر صدارت اجلاس میں احساس فلیگ شپ انیشیٹو کے تحت مختلف فلاحی پروگراموں پر اب تک کی پیشرفت کا جائزہ لیا گیا ۔وزیر اعلیٰ ہائوس سے جاری بیان کے مطابق اجلاس میں احساس نوجوان، احساس ہنر، احساس روزگار اور احساس اپنا گھر پروگرام کی پیشرفت کا جائزہ لیا گیا۔

وزیر اعلیٰ نے رواں مالی سال کے لئے احساس پروگراموں کے فنڈز بڑھا کر 8 ارب روپے کرنے کا اعلان بھی کیا ۔ہر پروگرام کے تحت رواں سال بلاسود قرضوں کی فراہمی پر دو ارب روپے خرچ کئے جائیں گے۔ اجلاس میں چاروں پروگراموں میں ضم اضلاع کے لئے علیحدہ اور مخصوص حصہ رکھنے کا فیصلہ کیا گیا۔ ضم اضلاع کے پروگراموں کے لئے فنڈز بھی علیحدہ مختص کئے جائیں گے۔

(جاری ہے)

اجلاس سے خطاب کرتے ہوئے وزیراعلی خیبرپختونخوا علی امین گنڈاپور نے کہا کہ ان پروگراموں کے تحت قرضوں کے حصول کے سلسلے میں ضم اضلاع کے لئے طریقہ کار اور لوازمات کو بھی آسان کیا جائے، ضم اضلاع کے عوام خصوصی توجہ کے مستحق ہیں۔انہوں نے کہا کہ کوشش کی جائے کہ رواں سال ضم اضلاع سے زیادہ سے زیادہ لوگ ان سکیموں سے مستفید ہوں ۔ وزیر اعلیٰ نے احساس پروگرامز کے تحت قرضوں کی تقسیم کا عمل تیز کرنے کی ہدایت کی ۔

علی امین گنڈاپور نے کہا کہ اس مقصد کے لیے درخواست گزاروں کے انتخاب کیلئے اہلیت کا میعارمزید آسان کیا جائے۔ اجلاس کو احساس پروگراموں کے تحت اب تک کی پیش رفت پر تفصیلی بریفنگ دی گئی ۔بریفنگ کے مطابق احساس نوجوان پروگرام کے کمپونینٹ ون کے تحت بنک آف خیبر کے ذریعے عمل درآمد جاری ہے، احساس پروگرام کے کمپونینٹ ون کے تحت 139 درخواست گزاروں میں 408 ملین روپے کے قرضے تقسیم کئے گئے ہیں۔

بریفنگ کے مطابق کمپونینٹ ون کے تحت منظور شدہ مزید 52 درخواست گزاروں کے لیے 116 ملین روپے درکار ہیں، احساس نوجوان پروگرام کے کمپونینٹ ٹو پر اخوت مائکرو فنانس کے ذریعے عمل درآمد جاری ہے۔ بریفنگ کے مطابق اخوت کمپونینٹ کے تحت مختص شدہ فنڈز سو فیصد تقسیم کیے جا چکے ہیں، اب تک 3585 درخواست گزاروں میں 602 ملین روپے کے بلاسود قرضے تقسیم کیے گئے ہیں، اخوت کمپونینٹ کے تحت مزید 1745 کیسز پراسیس میں ہیں۔

بریفنگ کے مطابق اخوت پروگرام کے تحت قرضوں کی ریکوری کی شرح بھی سو فیصد ہے، اب تک 42.88 ملین روپے ریکور ہو چکے ہیں، احساس ہنر پروگرام کے تحت بھی 647 درخواست گزاروں میں 307 ملین روپے کے قرضے تقسیم کیے جا چکے ہیں۔بریفنگ کے مطابق احساس ہنر پروگرام کے تحت مزید 592 کیسز پراسیس میں ہیں، احساس اپنا گھر سکیم کے تحت قرعہ اندازی کے ذریعے 76 کامیاب درخواست گزاروں میں 200 ملین روپے تقسیم کیے گئے ہیں، اسکیم کے تحت رواں مالی سال قرضوں کی فراہمی کے لیے شرائط میں مزید نرمی کر دی گئی ہے۔ بریفنگ کے مطابق اسکیم کے تحت اہلیت کے لیے آمدنی کی حد ایک لاکھ سے بڑھا کر ڈیڑھ لاکھ روپے ماہانہ کر دی گئی ہے۔ اسی طرح پانچ مرلہ کی شرط کو بڑھا کر دس مرلہ کر دیا گیا ہے۔