پنجاب پولیس کے لاہور سمیت صوبہ بھر میں سرچ، سویپ، کومبنگ آپریشنز

439 کومبنگ آپریشنز، 15 ہزار 543 سے زائد مشتبہ افراد کی چیکنگ، 60 مشکوک افراد حراست میں لئے گئے

جمعرات 7 اگست 2025 23:01

پنجاب پولیس کے لاہور سمیت صوبہ بھر میں سرچ، سویپ، کومبنگ آپریشنز

لاہور (اُردو پوائنٹ اخبارتازہ ترین - این این آئی۔ 07 اگست2025ء) پنجاب پولیس کے لاہور سمیت صوبہ بھر میں سرچ، سویپ اور کومبنگ آپریشنز جاری ہیں جس کے تسلسل میں گذشتہ 24 گھنٹوں کے دوران 439 کومبنگ آپریشنز، 15 ہزار 543 سے زائد مشتبہ افراد کی چیکنگ اور 60 مشکوک افراد حراست میں لئے گئے۔ ترجمان پنجاب پولیس نے تفصیلات سے آگاہ کرتے ہوئے بتایا کہ 25 سرچ اینڈ سویپ آپریشنز کیے گئے ، 2835 سے زائد افراد سے پوچھ گچھ اور 02 مشتبہ افرادکو حراست میں لیا گیا۔

(جاری ہے)

سنگین جرائم میں ملوث 244 اشتہاری، 105 عدالتی مفرور اور 39 عادی مجرمان بھی گرفتار کیے گئے۔ جرائم پیشہ و مشتبہ افراد کے قبضہ سے بڑی تعداد میں ناجائز اسلحہ اور گولیاں برآمد کی گئیں۔ جرائم پیشہ افراد کے خلاف کاروائیوں کے دوران 05 مجرمان کیفر کردار کو پہنچے جبکہ 05 زخمی حالت میں گرفتار کیے گئے۔ آئی جی پنجاب ڈاکٹر عثمان انور نے کہا کہ ملک دشمن و جرائم پیشہ عناصر کا محاسبہ کرنے کیلئے سرچ، سویپ اینڈ کومبنگ آپریشنز جاری رکھے جائیں۔