پی سی بی نے حیدر علی کو معطل کر دیا

پاکستان شاہینز کیساتھ انگلینڈ کا دورہ کرنے والے نوجوان قومی کرکٹر سے برطانوی پولیس کی جانب سے پوچھ گچھ کیے جانے کا انکشاف

محمد علی جمعرات 7 اگست 2025 21:34

لاہور ( اُردو پوائنٹ اخبارتازہ ترین۔ 07 اگست 2025ء ) نوجوان کرکٹر حیدر علی سے برطانوی پولیس کی پوچھ گچھ، پی سی بی نے قومی کرکٹر کو معطل کر دیا۔ تفصیلات کے مطابق پاکستان کے نوجوان اور باصلاحیت کرکٹر حیدر علی پاکستان شاہینز کے دورہ انگلینڈ کے دوران بڑی مشکل میں پھنس گئے۔ میڈیا رپورٹس کے مطابق برطانوی پولیس کی جانب سے حیدر علی سے کرمنل تفتیش کی جا رہی ہے، تاہم یہ واضح نہیں کہ ان پر کیا الزام ہے۔

پاکستان کرکٹ بورڈ نے بھی اس حوالے سے تصدیق کر دی ہے۔

(جاری ہے)

پی سی بی کی جانب سے جاری بیان کے مطابق حیدر علی کو برطانیہ میں مکمل قانونی معاونت فراہم کی گئی ہے۔ پاکستان کرکٹ بورڈ برطانوی قوانین کا مکمل احترام کرتا ہے اور چاہے گا کہ جو بھی تفتیش کا عمل شروع کیا گیا ہے، وہ اپنے قانونی اور منطقی انجام تک پہنچے۔ اسی اثناء میں پی سی بی نے حیدر علی کو معطل کرنے کا فیصلہ کیا ہے۔ جبکہ تمام قانونی کاروائی مکمل ہو جانے اور مکمل حقائق سامنے آنے کے بعد ہی پی سی بی کی جانب سے مزید کوئی کاروائی عمل میں لائے جائے گی۔ اس حوالے سے تب تک پی سی بی کی جانب سے مزید کوئی بیان جاری نہیں کیا جائے گا۔