Live Updates

وفاقی وزیر صحت کا کراچی میں پولیو مہم کی خود نگرانی کرنے کااعلان

پولیو ویکسین پلانے سے منع کرنے والوں میں سب سے زیادہ شرح کراچی کی ہے، بیماری سے بچائو کا واحد حل ویکسین ، والدین بچوں کو معذوری سے بچائیں، مصطفی کمال

جمعہ 29 اگست 2025 19:40

کراچی (اُردو پوائنٹ اخبارتازہ ترین - این این آئی۔ 29 اگست2025ء)وفاقی وزیر صحت مصطفی کمال نے کہا ہے کہ انسداد پولیو ویکسین پلانے سے منع کرنے والوں میں سب سے زیادہ شرح کراچی کی ہے۔کراچی میں پریس کانفرنس کرتے ہوئے مصطفی کمال نے کراچی میں پولیو مہم کی خود نگرانی کرنے کااعلان کرتے ہوئے کہا کہ پولیو سے بچائو کا واحد حل ویکسین ہے،اپنے بچوں کو معذوری سے بچائیں۔

انہوں نے کہا کہ صرف پاکستان اور افغانستان میں پولو وائرس موجود ہے، انشا اللہ جلد ہی پولیو سے ملک کو پاک کرلیں گے۔ انہوں نے کہا کہ یکم ستمبر سے ملک بھر میں پولیو مہم شروع ہو رہی ہے، مختلف حصوں میں سیلابی صورتحال ہے، این ڈی ایم اے کی ٹیم ہم سے رابطے میں ہے۔وفاقی وزیر نے کہا کہ آج اہم میٹنگ ہوئی، جس میں چاروں صوبوں کے چیف سیکرٹریز شامل ہوئے۔

(جاری ہے)

مصطفی کمال نے کہا کہ پورے ملک میں انسداد پولیو مہم چل رہی ہے، بہت جلد ملک کو پولیو سے پاک کرلیں گے، کراچی کے سیوریج میں پولیو وائرس موجود ہے۔انہوں نے کہا کہ پنجاب میں 10ستمبر سے پولیو مہم شروع ہورہی ہے، باقی 3صوبوں میں یکم ستمبر سے پولیو مہم شروع ہوگی۔وفاقی وزیر صحت نے کہا کہ ملک کے 127 اضلاع کے سیوریج میں پولیو وائرس موجود ہے، رواں سال 26 میں سے 16 پولیو کیسز کے پی میں ہیں۔

مصطفی کمال نے کہا کہ 13 کیسز جنوبی کے پی کے سے سامنے آئے ہیں، سندھ میں تمام اداروں کو سیلابی صورتحال سے آگاہ کردیا گیا ہے۔انہوں نے کہا کہ وفاقی حکومت اور صوبائی حکومت کو آرڈینیشن کے ساتھ صحت کی ضروریات پوری کررہے ہیں، ماحولیاتی تبدیلی کی وجہ سے صورتحال مزید بد تر ہوگی۔وزیر صحت نے کہا کہ ملک کے کونے کونے میں لوکل گورنمنٹ کا مضبوط نظام چاہیے، لوکل گورنمنٹ کے پاس اختیارات ہونے چاہئیں۔