خواجہ اظہار الحسن کا نیو کراچی اور نارتھ کراچی کے بارش متاثرہ علاقوں کا دورہ، مکینوں سے ملاقات ،مسائل سنے

انتظامیہ کی مجرمانہ غفلت اور نااہلی سے عوام مشکلات کا شکار، فوری اقدامات نہ ہوئے تو بھرپور احتجاج اور قانونی چارہ جوئی کی جائیگی،خواجہ اظہار الحسن

اتوار 14 ستمبر 2025 17:25

کراچی(اُردو پوائنٹ اخبارتازہ ترین - این این آئی۔ 14 ستمبر2025ء)متحدہ قومی موومنٹ پاکستان کے رہنما و رکن قومی اسمبلی خواجہ اظہار الحسن نے اپنے حلقہ انتخاب نیو کراچی اور نارتھ کراچی کے بارش سے متاثرہ علاقوں کا ایم کیو ایم پاکستان کے ذمہ داران و کارکنان کے ہمراہ دورہ کیا اور علاقائی مکینوں سے ملاقات کی۔ اس موقع پر انہوں نے کہا کہ یہ تباہی بارش کی نہیں بلکہ انتظامیہ کی مجرمانہ غفلت اور نااہلی کی دین ہے۔

انہوں نے کہا کہ نیو کراچی ٹان انتظامیہ کے پاس اربوں روپے موجود ہونے کے باوجود نکاسی آب کا مثر انتظام نہیں کیا گیا، عوام گندے پانی میں ڈوبے بیٹھے ہیں، بیماریاں پھیل رہی ہیں لیکن شہری حکومت اور ٹان انتظامیہ صرف نمائشی دوروں اور کھوکھلے بیانات تک محدود ہیں۔

(جاری ہے)

خواجہ اظہار الحسن نے متعلقہ یونین کونسل چیئرمین کو کڑی تنقید کا نشانہ بناتے ہوئے کہا کہ یوسی چیئرمین عوامی ووٹوں سے منتخب ہو کر بھی اپنے علاقے کے مین ہول تک بند نہیں کروا سکے، کھلے مین ہولز لوگوں کی جانوں کے لیے سنگین خطرہ ہیں اور یہ عوام دشمنی اور غفلت کی بدترین مثال ہے۔

انہوں نے خبردار کیا کہ اگر فوری طور پر نکاسی آب، کھلے مین ہولز کی بندش اور متاثرہ علاقوں کی بحالی کے لیے عملی اقدامات نہ کیے گئے تو عوام کو ساتھ ملا کر بھرپور احتجاج کیا جائے گا، ساتھ ہی قانونی ماہرین سے مشاورت کے بعد ذمہ دار چیئرمینوں اور انتظامی افسران کے خلاف عدالت میں مقدمات بھی دائر کیے جائیں گے تاکہ عوامی جان و مال سے کھیلنے والوں کو کٹہرے میں لایا جا سکے۔

خواجہ اظہار الحسن نے کہا کہ عوام اب مزید جھوٹے وعدوں پر یقین نہیں کریں گے اور اگر حکومت اور بلدیاتی نمائندے اپنی ذمہ داریاں پوری نہیں کرتے تو انہیں عوامی ردعمل اور قانونی کارروائی دونوں کا سامنا کرنا پڑے گا۔ اس دورے کے موقع پر فوری طور پر متعلقہ افسران کو ہدایات بھی دیں اور متعلقہ چیئرمین اور مئیر کو تحریری طور پر آگاہ بھی کردیا تاکہ فوری انتظامات کئے جائیں۔