صوبائی وزیر کھیل ملک فیصل ایوب کھوکھر کی زیر صدارت اجلاس،پیڈل ٹینس کے فروغ اور جدید سہولیات کی فراہمی سے متعلق امور پرتبادلہ خیال

بدھ 17 ستمبر 2025 20:00

لاہور (اُردو پوائنٹ اخبارتازہ ترین - اے پی پی۔ 17 ستمبر2025ء) صوبائی وزیر کھیل ملک فیصل ایوب کھوکھر کی زیر صدارت نیشنل ہاکی سٹیڈیم میں اجلاس منعقد ہوا، جس میں پنجاب میں پیڈل ٹینس کے فروغ اور اس کے لیے جدید سہولیات کی فراہمی سے متعلق امور پر تفصیلی تبادلہ خیال کیا گیا۔ اجلاس میں فیصلہ کیا گیا کہ لاہور، ملتان اور راولپنڈی میں انٹرنیشنل معیار کے پیڈل ٹینس کورٹ تعمیر کیے جائیں گے۔

صوبائی وزیر کو دوران بریفنگ بتایا گیا کہ نشتر پارک سپورٹس کمپلیکس میں جدید پیڈل ٹینس کورٹ کی تعمیر جلد شروع ہو رہی ہے تاکہ نوجوان نسل کو جدید گیم سے روشناس کرایا جا سکے۔اس موقع پر صوبائی وزیر کھیل نے کہا کہ سپورٹس بورڈ پنجاب عالمی سطح کی کھیلوں کی سہولیات فراہم کرنے کے لیے پرعزم ہے۔

(جاری ہے)

کھیلتا پنجاب پنک گیمز" میں پیڈل ٹینس کو شامل کیا جا رہا ہے جبکہ صوبہ پنجاب میں پہلی مرتبہ یہ جدید کھیل متعارف کرایا جا رہا ہے۔

فیصل ایوب کھوکھر نے کہا کہ سپورٹس بورڈ پنجاب اور پیڈل ٹینس ایسوسی ایشن باہمی تعاون کے ذریعے اس کھیل کو فروغ دیں گے۔ ان کا کہنا تھا کہ اگلے سال پیڈل ٹینس کا دائرہ کار مزید وسیع کیا جائے گا اور نوجوان کھلاڑیوں کے لیے کھیلوں کے نئے مواقع پیدا ہوں گے۔ انہوں نے ہدایت کی کہ پیڈل ٹینس ایونٹ جلد منعقد کرانے کے لیے جامع پریزنٹیشن تیار کی جائے اور ساتھ ہی اپنی روایتی کھیلوں کو بھی بھرپور توجہ دی جائے۔

انہوںنے واضح کیا کہ پیڈل ٹینس کورٹ کو انٹرنیشنل معیار کے مطابق بنایا جائے گا اور جلد ہی لاہور میں پہلا انٹرنیشنل پیڈل ٹینس میچ کرایا جائے گا۔ انہوں نے کہا کہ کھیلوں میں انٹرنیشنل ایونٹس کے انعقاد سے پنجاب کا مثبت تشخص اجاگر ہوگا اور نوجوان نسل کو نئی سمت ملے گی۔ اجلاس میں صدر، پاکستان پیڈل فیڈریشن منصور علی خان، جنرل سیکرٹری فاحد بخش الہی، ایسوسی ایٹ سیکرٹری بیرسٹر بلال شفیق، سیکرٹری اسپورٹس مظفر خان سیال اور ڈی جی اسپورٹس خضر افضال چوہدری کے ہمراہ دیگر متعلقہ افراد نے شرکت کی۔