سری لنکن کرکٹ بورڈ کی ایگزیکٹو کمیٹی کا اجلاس ، پاکستان، افریقہ کے بعد سری لنکا نے بھی نظر ثانی سفارشات کے مسودے کی مخالفت کردی، اب سری لنکا نے بھی باضابطہ طور پر پاکستان کے موٴقف کی حمایت کردی ، آئی سی سی پر قبضے کی تمام سازشوں کا ڈٹ کر مقابلہ کیا جائے گا، ایگزیکٹو کمیٹی سری لنکن بورڈ

جمعرات 6 فروری 2014 01:55

کولمبو(اُردو پوائنٹ اخبار آن لائن۔6فروری۔2014ء) پاکستان اور جنوبی افریقا کی جانب سے بگ تھری کی مخالفت کے بعد سری لنکا نے بھی نظرثانی سفارشات کے مسودے کی مخالفت کردی ہے۔ میڈیا رپورٹس کے مطابق سری لنکن کرکٹ بورڈ کے ایگزیکٹو کمیٹی کے اجلاس میں اراکین نے بگ تھری کے مسودے کی مخالفت کرتے ہوئے پیش کردہ تجاویز کو مسترد کردیا، ایگزیکٹیو کمیٹی کا کہنا تھا کہ آئی سی سی پر قبضے کی تمام سازشوں کا ڈٹ کر مقابلہ کیا جائے گا۔

(جاری ہے)

واضح رہے کہ دبئی میں آئی سی سی کے اجلاس میں پاکستان نے بگ تھری کے معاملے پر جو واضح موٴقف اختیار کیا تھا اس کی جنوبی افریقا، ویسٹ انڈیز، سری لنکا اور بنگلادیش نے بھی حمایت کی تھی جب کہ جنوبی افریقن کرکٹ بورڈ کے صدر کا اس حوالے سے کہنا تھا جنوبی افریقا بگ تھری کے معاملے پر پاکستان کے ساتھ کھڑا ہے اور اب سری لنکا نے بھی باضابطہ طور پر پاکستان کے موٴقف کی حمایت کردی ہے۔بگ تھری کے معاملے پر انٹرنیشنل کرکٹ کونسل کا آئندہ اجلاس 8 فروری کو سنگاپور میں ہوگا جب کہ آئی سی سی کے صدر ایلن آئزک کا کہنا ہے کہ بگ تھری کے معاملے پر تمام اراکین اس اجلاس میں کسی نہ کسی نتیجے پر پہنچ جائیں گے۔