ایئر ایشیا کے جہاز کی دم نکال لی گئی، بلیک باکس کی تلاش جاری

اتوار 11 جنوری 2015 10:14

جاوا(اُردو پوائنٹ اخبارآن لائن۔11جنوری۔2015ء )انڈونیشیا کی بحریہ نے سمندر سے انڈونیشیا سے سنگاپور جاتے ہوئے تباہ ہونے والے ایئرایشیا کے جہاز کا پچھلا حصہ نکال لیا ہے۔انڈونیشیا کی بحریہ بلیک باکس کی بھی تلاش کر رہی ہے۔ یہ بلیک باکس جہاز کے پچھلے حصے سے علیحدہ ہو گیا ہے۔اس سے قبل ریسکیو حکام کے مطابق انھیں بحیرہ جاوا میں ایک سگنل موصول ہوا تھا جس کا تعلق ممکنہ طور پر جہاز کے بلیک باکس سے ہو سکتا ہے۔

اب تک ریسکیو ٹیموں نے سمندر سے 46 لاشیں نکال لی ہیں۔ حکام کا اندازہ ہے کہ بیشتر مسافروں کی لاشیں فیوزیلاڑ (جہاز کا مرکزی حصہ جہاں مسافر بیٹھتے ہیں) میں ہیں، تاہم ابھی تک فیوزیلاڑ نہیں مل پایا۔انڈونیشیا کی نیشنل ٹرانسپورٹ سیفٹی کمیٹی کے ایک اہلکار کے مطابق انھیں ’جہاز کا ملبہ تلاش کرنے والے اہلکاروں کی جانب سے سگنل کے موصول ہونے کی تصدیق ہوئی ہے اور ہمارے خیال میں یہ جہاز کا بلیک باکس ہی ہے اور غوطہ خوروں کو اس کی تصدیق کرنا ہے۔

(جاری ہے)

بدقسمتی سے بلیک باکس طیارے کے دم سے الگ ہو گیا تھا اور اب غوطہ خوروں کو اس کی اصل جگہ کی نشاندہی کرنی ہے۔‘بلیک باکس کی مدد سے تفتیش کاروں کو جہاز کے تباہ ہونے کی وجہ معلوم ہو سکے گی۔ایئر ایشیا کا یہ جہاز 28 دسمبر کو انڈونیشیا کے دوسرے بڑے شہر سورابایا سے سنگاپور جا رہا تھا کہ خراب موسم کے دوران گر کر تباہ ہو گیا۔ جہاز پر 162 افراد سوار تھے۔اس وقت جہاز کے ملبے اور لاشوں کی تلاش میں مختلف ملکوں کے 30 جہاز حصہ لے رہے ہیں۔اس کے علاوہ چھ ہوائی جہاز اور 14 ہیلی کاپٹر بھی ان کارروائیوں میں شامل ہیں۔

Facebook Twitter Google + Share on Whatsapp

ایئر ایشیا کے جہاز کی دم نکال لی گئی، بلیک باکس کی تلاش جاری

اتوار 11 جنوری 2015 کی مزید خبریں