مودی جس تھالی میں کھاتا ہے اسی میں چھید کرتا ہے ،پرناب مکھر جی ریاست اور ملک کو بچانا ہے تو مودی سرکار کو گھر بھیج کر قومی حکومت قائم کر دی جائے،وزیراعلیٰ بنگال

ہفتہ 7 جنوری 2017 12:49

کلکتہ( اُردو پوائنٹ اخبارآن لائن۔7جنوری۔2017ء ) بھارت میں صدر پرناب مکھرجی سے نریندر مودی کی حکومت کی چھٹی کر کے قومی حکومت قائم کر کے ریاست کو بچانے کا مطالبہ زور پکڑنے لگا جب کہ وزیراعلیٰ بنگال ممتا بینرجی کا کہنا ہے کہ مودی جس تھالی میں کھاتا ہے اْسی میں چھید کرتا ہے۔بھارتی ریاست بنگال کی وزیراعلیٰ ممتا بنرجی نے صدر پرناب مکھرجی سے کہا کہ اگر ریاست اور ملک کو بچانا ہے تو مودی سرکار کو گھر بھیج کر قومی حکومت قائم کر دی جائے۔

ان کا کہنا تھا کہ موجودہ حکومت نااہل ہے اور ہم سمجھتے ہیں کہ صدر ہی واحد شخص ہیں جو ان حالات میں ریاست کو بچا سکتے ہیں۔ممتا بینرجی بھارتی وزیراعظم مودی کو ”کالی داسا“ قرار دیتے ہوئے کہا کہ یہ جس تھالی میں کھاتا ہے اسی میں چھید کرتا ہے۔

(جاری ہے)

ان کا کہنا تھا کہ مجھے کوئی اعتراض نہیں ہے اگر مودی کی جگہ ایل کے ایڈوانی، راجناتھ سنگھ یا ارون جیٹلے حکومت چلائیں اورمخصوص حالات میں بھارت میں 2 سال کے لئے صدارتی حکومت قائم کرنے کے بھی حق میں ہوں۔

وزیراعلیٰ بنگال نے نریندر مودی کو تنقید کا نشانہ بناتے ہوئے کہا کہ نوٹوں کی تبدیلی کی وجہ سے ان کے صوبے کے ایک کروڑ 70 لاکھ افراد براہ راست متاثر ہوئے۔ انہوں نے مزید کہا کہ پرانے نوٹوں پر پابندی کے باعث کسان طبقہ بھی بری طرح متاثر ہوا جب کہ اشیائے ضرورت کی قیمتیں بھی بڑھ گئیں اور ہم قحط سالی کی جانب بڑھ رہے ہیں۔