اسلا م آباد سے پروفیسر کی گمشدگی کا معمہ حل نہ ہوسکا
وزیرداخلہ کی معاملے سے لاعلمی ، قانون نافذ کرنیوالے اداروں اور وزارت داخلہ کے درمیان ورکنگ ریلیشن شپ پر سوالیہ نشان اٹھ گیا گزشتہ 12سالوں میں جبری گمشدہ افراد کی تعداد 8000تک جا پہنچی، آزادی اظہار وبال جان بن گئی ،کوئی پرسان حال نہیں
اسلام آباد (اُردو پوائنٹ اخبارآن لائن۔12جنوری۔2017ء) وفاقی دارالحکومت سے اغواء ہونے والے پروفیسر کی گمشدگی کا معمہ حل نہ ہوسکا، وزیرداخلہ کی معاملے سے لاعلمی نے قانون نافذ کرنے والے اداروں اور وزارت داخلہ کے درمیان ورکنگ ریلیشن شپ پر سوالیہ نشان کھڑا کر دیا،گزشتہ 12سالوں میں جبری گمشدہ افراد کی تعداد 8000تک جا پہنچی، آزادی اظہار وبال جان بن گئی ،کوئی پرسان حال نہیں.تفصیلات کے مطابق گزشتہ ہفتے کی شب سماجی رابطے کی ویب سائٹ پر سرگرم رہنے والے فاطمہ جناح وویمن یونیورسٹی کے پروفیسرسلمان حیدر کی گمشدگی نے شہر اقتدار میں لاپتہ افراد کے معاملے کو پھر سے ہوا دے دی ہے، ایک ہفتے میں سماجی رابطوں کی ویبز پرسرگرم رہنے والے 4افراد کی گمشدگی نے سول سوسائٹی اور انسانی حقوق کا تحفظ کرنے والی تنظیموں کو سیخ پا کر دیا. وفاقی پولیس اور قانون نافذ کرنے والے ادارے بھی کوئی سراغ لگانے میں ناکام رہے ہیں، جس کے باعث ان کی کارکردگی پر کئی سوالات جنم لے رہے ہیں، ذرائع کے مطابق گزشتہ 12 سالوں میں گمشدہ افراد کی تعداد تقریبا 8000کو جا پہنچی ہے، جو پاکستان جیسے ملک میں انتہائی خطرناک ہے، وزیر داخلہ کی جانب سے سینٹ میں دیئے گئے بیان سے بظاہر یہی لگتا ہے کہ وزارت داخلہ معاملے سے لاپتہ ہے اور اگر یہ جبری گمشدگی ہوئی تو وزارت داخلہ اور قانون نافذ کرنے اداروں کے مابین باہمی تعاون کی کمی پر کئی سوالات جنم لے رہے ہیں،فاطمہ جناح یونیورسٹی کے اغواء ہونے والے پروفیسرسلمان حیدر سے متعلق انکشاف ہوا ہے کہ مغوی سوشل میڈیا پر ایک پیج بنا کر اہم ملکی و غیر ملکی معلومات مہیا کرنے کے ساتھ ساتھ حکومتی پالیسیوں اور تنگ نظر مذہبی تنظیموں کو مسلسل تنقید کا نشانہ بناتے رہے ہیں۔
(جاری ہے)
مزید متعلقہ خبریں پڑھئیے :
متعلقہ عنوان :
