ٹرمپ کو سفارت خانے کی منتقلی روکنا ہوگی ،فلسطینی صدر

ایسا کیا گیا تو اور بھی کئی آپشنز موجود ہیں، عرب ملکوں کے سا تھ بات چیت میں غور کریں گے، محمود عباس

اتوار 15 جنوری 2017 17:26

مقبوضہ بیت المقدس ( اُردو پوائنٹ اخبارآن لائن۔15جنوری۔2017ء)فلسطینی صدر محمود عباس نینو منتخب امریکی صدر ڈونلڈ ٹرمپ کو خبر دار کیا ہے کہ اگر امریکی سفارت خانے کی تل ابیب سے مقبوضہ بیت المقدس منتقلی نہ روکی گئی تو اسرائیل کے وجود کو تسلیم نہ کرنے پر غور کر سکتے ہیں۔

(جاری ہے)

انھوں نے کہاکہ ایسا کیا گیا تو اور بھی کئی آپشنز موجود ہیں جن پر عرب ملکوں کے سا تھ بات چیت میں غور کریں گے،جن میں سے ایک اسرائیل کے وجود کو تسلیم نہ کرنا بھی ہے مگر امید ہے کہ بات یہاں تک نہیں پہنچے گی۔

فرانسیسی اخبار کو انٹرویو میں محمود عباس نے کہاکہ انھوں نے ٹرمپ کو خط لکھ کر ایسا نہ کرنے کو کہا ہے کیونکہ اس سے دو ریاستی حل کا منصوبہ کٹھائی میں پڑ جائے گا۔ٹرمپ کہہ چکے ہیں کہ وہ مقبوضہ بیت المقدس کو اسرائیل کا دارالحکومت تسلیم کر تے ہوئے امریکی سفارت خانہ تل ابیب سے یہاں منتقل کر دیں گے۔امریکا اور اقوام متحدہ کے زیادہ تر مما لک مقبوضہ بیت المقدس کو اسرائیل کا حصہ تصور نہیں کرتے۔