چین پاکستان کے ساتھ زمینی رابطوں کو مزید مستحکم بنانے کے لیے 24.8 ارب ڈالر کی سرمایہ کاری کرئے گا

منگل 7 فروری 2017 18:39

بیجنگ(اُردو پوائنٹ اخبارآن لائن۔8فروری۔2017ء)چین پاکستان کے ساتھ زمینی رابطوں کو مزید مستحکم بنانے کے لیے 24.8 ارب ڈالر کی سرمایہ کاری کرئے گا ۔ چینی حکومت نے فیصلہ کیا ہے کہ وہ اپنے مسلم اکثریتی والے صوبے سنکیانگ میں شاہراہوں کا جال بچھانے کے لیے 24.8 ارب ڈالر کی سرمایہ کاری کرے گی۔ سلک روڈ اکنامک بیلٹ کے ذریعے دیگر ممالک سے چین کا جو صوبہ جڑے گا وہ سنکیانگ ہوگا لہٰذا چینی حکومت نے فیصلہ کیا ہے کہ یہاں بہترین سڑکیں تعمیر کی جائیں تاکہ پاکستان اور دیگر ممالک کے درمیان بہتر طریقے سے آمد و رفت ہوسکے۔

مختص کی گئی رقم سنکیانگ میں رواں برس ہی استعمال کی جائے گی جوکہ 2016 کی نسبت 6 گنا زیادہ ہے۔ سنکیانگ کے معاشی منصوبہ بندی کے اعلیٰ عہدے دار نے بتایا کہ انفرااسٹرکچر کے نئے منصوبوں کی بدولت علاقے میں سینکڑوں لوگوں کو روزگار ملے گا۔

(جاری ہے)

سنکیانگ ڈویلمپنٹ اینڈ ریفارم کمیشن کے ڈائریکٹر ژینگ چن لن نے بتایا کہ اس خطے میں اس سے قبل اتنے بڑے پیمانے پر کبھی بھی سرمایہ کاری نہیں کی گئی۔

سنکیانگ میں 1.18 ارب ڈالر ریلوے جبکہ 0.7 ارب ڈالر ایوی ایشن کے شعبے میں بھی خرچ کیے جائیں گے۔ اس وقت سنکیانگ کے 40 فیصد شہر اور قصبے ایسے ہیں جو ہائی وے کے ذریعے منسلک نہیں۔ڑینگ کا کہنا ہے کہ ہائی ویز کے بغیر سنکیانگ کا تیل، کوئلہ اور زرعی اجناس بہتر طریقے سے صوبے سے باہر نہیں جاسکتا اور ذرائع نقل و حمل ہموار نہ ہونے کی وجہ سے لاگت بھی کئی گنا بڑھ جائے گی ۔

فی الوقت صرف ایک ہائی وے ایسی ہے جو سنکیانگ کو چین کے دیگر مشرقی حصوں سے جوڑتی ہے اور وہ سڑکیں جو اس وقت چین کے پڑوسی ممالک کو سنکیانگ سے جوڑتی ہیں وہ اس قابل نہیں کہ مستقبل میں ہونے والی تجارتی سرگرمیوں کا بوجھ برداشت کرسکیں۔ژینگ کا کہنا ہے کہ بہتر ٹرانسپورٹیشن کے بغیر سلک روڈ اکنامک بیلٹ کے تحت سنکیانگ کا معاشی حب بننا ممکن نہیں لہٰذا سنکیانگ کو اس چیلنج کا سامنا کرنا پڑے گا۔

چینی حکومت اکنامک بیلٹ کے حوالے سے سنکیانگ کو انتہائی اہم تجارتی مرکز تصور کرتی ہے جس کی سرحدیں قازقستان، پاکستان اور منگولیا سے ملتی ہیں۔ واضح رہے کہ سلک روڈ اکنامک بیلٹ چینی صدر شی جن پنگ کا ”ایک خطہ ایک سڑک“ وژن کا حصہ ہے جو انہوں نے 2013 میں پیش کیا تھا اور اس کا مقصد قدیم تجارتی راہداری کو بحال کرنا ہے۔اس سلسلے میں چین پاکستان میں بھی چائنا پاکستان اقتصادی راہداری (سی پیک) پر 46 ارب ڈالر سے زائد کی سرمایہ کاری کررہا ہے۔

Facebook Twitter Google + Share on Whatsapp

چین پاکستان کے ساتھ زمینی رابطوں کو مزید مستحکم بنانے کے لیے 24.8 ارب ڈالر کی سرمایہ کاری کرئے گا

بدھ 8 فروری 2017 کی مزید خبریں