آرمی چیف کا جنوبی وزیرستان ایجنسی کا دورہ ،ْ آپریشنل کامیابیوں ،ْ ترقیاتی کاموں اور بہتر بارڈرز سکیورٹی مینجمنٹ کیلئے اقدامات پر اطمینان کا اظہار

جنرل قمر جاوید باجوہ کی علاقہ میں پائیدار امن کی غرض سے آپریشنز اور سماجی اقتصادی ترقی پر توجہ مرکوز رکھنے کی ہدایت پاک فوج قبائلیوں کی امنگوں کے مطابق فاٹا کو حکومت کی جانب سے قومی دھارے میں لانے کی حمایت جاری رکھے گی ،ْ جوانوں سے گفتگو جنرل آفیسر کمانڈنگ کی طرف سے بارڈر مینجمنٹ اور عارضی بے گھر افراد کی بحالی سمیت ایجنسی میں سکیورٹی اور کامیابیوں کو مستحکم بنانے کے حوالے سے بریفنگ

اتوار 12 فروری 2017 19:00

راولپنڈی (اُردو پوائنٹ اخبارآن لائن۔13فروری۔2017ء) آرمی چیف جنرل قمر جاوید باجوہ نے جنوبی وزیرستان میں آپریشنل کامیابیوں ،ْ ترقیاتی کاموں اور بہتر بارڈرز سکیورٹی مینجمنٹ کیلئے اقدامات پر اطمینان کا اظہار ،ْ علاقہ میں پائیدار امن کی غرض سے آپریشنز اور سماجی اقتصادی ترقی پر توجہ مرکوز رکھنے کی ہدایت کرتے ہوئے واضح کیا ہے کہ پاک فوج قبائلیوں کی امنگوں کے مطابق فاٹا کو حکومت کی جانب سے قومی دھارے میں لانے کی حمایت میں اپنی کوششیں جاری رکھے گی ۔

آئی ایس پی آر کے مطابق چیف آف آرمی سٹاف جنرل قمر جاوید باجوہ نے جنوبی وزیرستان ایجنسی کا دورہ کیا اور اپنا دن وہاں تعینات فوجیوں کے ساتھ گزارا ۔آرمی چیف کو جنوبی وزیرستان پہنچنے پر جنرل آفیسر کمانڈنگ (جی او سی)کی طرف سے بارڈر مینجمنٹ اور عارضی بے گھر افراد کی بحالی سمیت ایجنسی میں سکیورٹی اور کامیابیوں کو مستحکم بنانے کے حوالے سے بریفنگ دی گئی ۔

(جاری ہے)

آرمی چیف نے آپریشنل کامیابیوں ،ْ ترقیاتی کاموں اور بہتر بارڈرز سکیورٹی مینجمنٹ کیلئے اقدامات پر اطمینان کا اظہار کرتے ہوئے علاقہ میں پائیدار امن کی غرض سے استحکام کیلئے آپریشنز اور سماجی اقتصادی ترقی پر توجہ مرکوز رکھنے کی ہدایت کی ۔ فوجیوں سے گفتگو کرتے ہوئے آرمی چیف نے ان کی بہادری اور عزم کوسراہا جس کے نتیجے میں ریاست کی رٹ دوبارہ قائم ہوئی ۔

انہوںنے فوج کی کوششوں میں مدد پر قبائلی بھائیوں کے عزم اور مقامی انتظامیہ کے تعاون کو بھی سراہا ۔جنرل قمر جاوید باجوہ نے کہا کہ پاک فوج قبائلیوں کی امنگوں کے مطابق فاٹا کو حکومت کی جانب سے قومی دھارے میں لانے کی حمایت میں اپنی کوششیں جاری رکھے گی ۔قبل ازیں جنوبی وزیرستان ایجنسی پہنچنے پر کمانڈر پشاور کور لیفٹیننٹ جنرل نذیر احمد بٹ نے آرمی چیف کا استقبال کیا ۔