پنجاب میں کوئی نوگو ایریا نہیں،سب اس بات پر متفق بھی ہیں، کچھ شر پسند عناصر باہر سے پنجاب میں آتے ہیں ،انہیں قابو میں لانے کے لیے سب کو مل کر کام کرنے کی ضرورت ہے، وزیر مملکت داخلہ محمد بلیغ ا لرحمان

بدھ 15 فروری 2017 19:36

اسلام آباد ۔ (اُردو پوائنٹ اخبار آن لائن۔ جمعرات 16 فروری 2017ء) وزیر مملکت برائے داخلہ محمد بلیغ ا لرحمان نے کہا ہے کہ پنجاب میں کوئی نوگو ایریا نہیں،سب اس بات پر متفق بھی ہیں، کچھ شر پسند عناصر باہر سے پنجاب میں آتے ہیں انہیں قابو میں لانے کے لیے سب کو مل کر کام کرنے کی ضرورت ہے، اس لیے یہاں آپریشن کی کوئی ضرورت نہیں اور ویسے بھی پولیس سمیت دیگر قانون نافذ کرنے والے ادارے یہاں اپنا کام بہتر طریقے سے کر رہے ہیں جسے مزید بہتر کیا جا رہا ہے، ان خیالات کا اظہار انہوں نے گذشتہ روز ایک نجی ٹی وی چینل سے گفتگو کرتے ہوئے کیا، انہوں نے کہا کہ نیشنل ایکشن پلان کے تمام نکات پر عمل درآمد کیا جا رہا ہے، نیکٹا فعال ہے جبکہ موبائل سموں کی رجسٹریشن کا عمل بھی مکمل کیا جا چکا ہے، انہوں نے کہا نیشنل ایکشن پلان پر عمل درآمد میں صوبائی حکومتیں بھی تعاون کر رہی ہیں اور یہی اس کی خوبصورتی بھی ہے کہ ہم سب متحد ہیں جس کی وجہ سے کراچی اور فاٹا سمیت پورے پاکستان میں جرائم کی شرح میں کمی آئی ہے، آج کا پاکستان 2013ء کے پاکستان سے کافی بہتر اور پرامن ہے، پاکستان میں امن و امان کی بحالی میں ہماری پاک فوج کے جوانوں سمیت پولیس اور دیگر قانون نافذ کرنے والے اداروں نے بھی لازوال قربانیاں دی ہیں اور وفاقی حکومت صوبائی حکومتوں کو کوآرڈینیٹ بھی کر رہی ہے، وزیر مملکت کا کہنا تھا کہ کراچی آپریشن سیاسی وابستگی سے بالاتر ہو کر کیا گیا جس کے مثبت نتائج حاصل ہوئے ہیں اور کراچی کی روشنیاں بحال ہو گئی ہیں، ایک سوال کے جواب میں انہوں نے کہا کہ لائوڈ اسپیکر کے غلط استعمال سمیت اشتعال انگیز تقاریر اور ایسے مواد کو فروخت کرنے والوں کے خلاف بھی کاروائی عمل میں لائی گئی اور ہزاروں لوگوں کو گرفتار بھی کیا گیا ہے، انہوں نے کہا کہ پنجاب میں فی الحال تو آپریشن کی کوئی ضرورت نہیں لیکن اگرضرورت پیش آئی تو یہاں بھی ضرور آپریشن ہو گا، بلیغ ا لرحمان کا کہنا تھا کہ عوام کے جان و مال کا تحفظ حکومت وقت کی ذمہ داری ہے جسے پورا کیا جا رہا ہے، پاکستان مسلم لیگ ن کی موجودہ حکومت کی موثر و کارآمد پالیسیوں کی بدولت آج ملک بھر میں امن و امان کی صورت حال میں نمایاں بہتری ہوئی ہے اور ملک ترقی و خوشحالی کی راہ پر گامزن ہو چکا ہے۔