ایف آئی اے نے سوشل میڈیا پر گستاخانہ مواد کے معاملے پر کارروائی کا آغاز کردیا

سوشل میڈیا پر گستاخانہ مواد کی تشہیر کے خلاف تھانہ رمنا پولیس نے مقدمہ درج کرلیا

جمعرات 9 مارچ 2017 23:43

اسلام آباد ۔ (اُردو پوائنٹ اخبار آن لائن۔ جمعہ 10 مارچ 2017ء) اسلام آباد ہائی کورٹ کے حکم پر وفاقی تحقیقاتی ادارہ (ایف آئی اے ) نے سوشل میڈیا پر گستاخانہ مواد کے معاملے پر کارروائی کا آغاز کردیا۔ایف آئی اے کی جانب سے جاری کردہ معلومات کے مطابق ایف آئی اے نے گستاخانہ مواد میں ملوث عناصر کے خلاف اشتہار جاری کردیا ہے ۔

اشتہار کے مطابق ایف آئی اے نے سوشل میڈیا پر گستاخانہ مواد جاری کرنے والوں کے خلاف کارروائی کا آغاز کردیا ہے۔ اشتہار میں عوام سے اپیل کی گئی ہے کہ ایسے عناصر جو گستاخانہ کاروائیوں میں ملوث سے متعلق آیف آئی اے کو آگاہ کریں۔ گستاخانہ مواد جاری کرنے والوں کے خلاف ٹھوس معلومات اور ثبوت سے سائبر کرائم سیل کو آگاہ کریں۔

(جاری ہے)

دوسری جانب سوشل میڈیا پر گستاخانہ مواد کی تشہیر کے خلاف تھانہ رمنا پولیس نے مقدمہ درج کرلیا ہے ۔

اسلام آباد ہائی کورٹ کے حکم پر ایس ایچ او تھانہ رمنا ارشاد ابڑو کی مدعیت میں مقدمہ درج کیا گیا ہے ۔پولیس ترجمان کے مطابق نامعلوم افراد کے خلاف درج مقدمے میں توہین رسالت کی دفعات شامل کی گئی ہیں۔ مقدمے کی تفتیش پولیس اور ایف آئی اے مشترکہ طور پر کریں گے ۔تفتیشی عمل میں پاکستان ٹیلی کمیونیکیشن اتھارٹی سے بھی معاونت لی جائے گی۔