آرمی چیف کا آوران کا دورہ، سیکیورٹی صورتحال اور عوام کی بہبود کیلئے اٹھائے گئے اقدامات بارے بریفنگ دی گئی

بلوچستان میں ترقیاتی کاموں میں تعاون جاری رکھیں گے، آرمی ، ایف سی اور قانون نافذ کرنیوالے دیگر اداروں کی کوششوں سے سیکیورٹی اور امن وامان کی صورتحال بہتر ہوئی ہے،جنرل قمر جاوید باجوہ طبی سہولیات سے ڈیڑھ لاکھ افراد نے فائدہ اٹھایا ، آوران کے طلباء کو بورڈنگ ،لاجنگ سمیت مفت تعلیمی سہولیات فراہم کی جارہی ہیں، بریفنگ

ہفتہ 6 مئی 2017 20:36

راولپنڈی / آوران (اُردو پوائنٹ اخبار آن لائن۔ اتوار 7 مئی 2017ء) آرمی چیف جنرل قمر جاوید باجوہ نے کہا ہے کہ بلوچستان میں ترقیاتی کاموں میں تعاون جاری رکھیں گے، آرمی ، ایف سی اور قانون نافذ کرنیوالے دیگر اداروں کی کوششوں سے سیکیورٹی اور امن وامان کی صورتحال بہتر ہوئی ہے۔آئی ایس پی آر کے مطابق چیف آف آرمی سٹاف جنرل قمر جاوید باجوہ نے ہفتہ کوآوران بلوچستان کا دورہ کیا۔

آرمی چیف کو سیکیورٹی صورتحال اور آرمی اور ایف سی کی جانب سے جنوبی بلوچستان میں عوام کی فلاح وبہبود کیلئے کئے گئے اقدامات کے بارے میں بتایا گیا ۔ پاک فوج کے سربراہ کو بتایا گیا کہ طبی سہولیات کیلئے اٹھائے گئے اقدامات کے دوران تقریبا ڈیڑھ لاکھ افراد نے فائدہ اٹھایا ۔

(جاری ہے)

سیکیورٹی اداروں کی جانب سے طبی سہولیات کیلئے اٹھائے گئے اقدامات میں ڈی ایچ کیو ہسپتال آوران کی استعداد بڑھانے کیلئے سول انتظامیہ کیساتھ فعال پارٹنر شپ جیسے اقدامات شامل ہیں۔

آرمی چیف کو بتایا گیا کہ آوران سے تعلق رکھنے والے طلباء کو بورڈنگ اور لاجنگ سہولیات سمیت آرمی اور ایف سی کی جانب سے مفت تعلیم فراہم کی جارہی ہے جبکہ ایف سی بلوچستان کی جانب سے ایک نیا سکول بھی حال ہی میں قائم کیا گیا ہے۔ آرمی چیف نے فوج ، ایف سی اور قانون نافذ کرنیوالے دیگر اداروں کی جانب سے کاوشوں کو سراہا جس کے نتیجے میں سیکیورٹی اور امن وامان کی صورتحال میں بہتری آئی ہے۔

انہوں نے کہا کہ ہم بلوچستان میں ترقیاتی کاموں میں تعاون جاری رکھیں گے۔ بعد ازاں جنرل قمر جاوید باجوہ نے مقامی عمائدین اور معززین سے ملاقات کی جنہوں نے علاقہ میں ترقی اور سیکیورٹی کیلئے پاک فوج کی کوششوں کو سراہا۔ آرمی چیف نے سیکیورٹی فورسز سے تعاون پر اہل علاقہ کا شکریہ ادا کیا۔ قبل ازیں آرمی چیف کی آمد پر کمانڈر جنوبی کمانڈ لیفٹیننٹ جنرل عامر ریاض نے ان کا استقبال کیا۔