لاہور ہائیکورٹ نے پرویز مشرف کو فیصل آباد میں جلسے کی اجازت نہ دینے کیخلاف درخواست نمٹا دی

جمعرات 10 اگست 2017 16:35

لاہور ۔ (اُردو پوائنٹ اخبار آن لائن۔ جمعہ 11 اگست 2017ء) لاہور ہائیکورٹ نے سابق صدر مملکت پرویز مشرف کو فیصل آباد میں جلسے کی اجازت نہ دینے کیخلاف دائر درخواست سرکاری وکیل کی طرف سے جلسے کی اجا زت دینے کے بیان کی روشنی میں نمٹا دی،لاہور ہائیکورٹ کے چیف جسٹس سیدمنصور علی شاہ نے کیس کی سماعت کی،سابق صدر پرویز مشرف کی جانب سے ایڈووکیٹ اشتیاق چوہدری نے عدالت کو آگاہ کیا کہ آئین کے تحت شہریوں کو پرامن جلسہ کرنے اور سیاسی جماعت کو سیاسی سرگرمیاں کرنے سے نہیں روکا جا سکتا،انہوں نے بتایا کہ ضلعی انتظامیہ کی جانب سے آل پاکستان مسلم لیگ کو 12اگست کو فیصل آباد میں جلسے کی اجازت نہیں دی جارہی، انہوں نے کہا کہ فیصل آباد کی ضلعی انتظامیہ نے جلسہ کی اجازت دینے سے صاف انکار کردیا ہے، سرکاری وکیل نے عدالت کو آگاہ کیا کہ پرویز مشرف کو جلسے کی اجازت دیدی گئی ہے،جس پردرخواست گزار نے جلسے کی اجازت دینے پر درخواست واپس لے لی۔