چائے آنکھوں میں موتیاکے خطرے کو 74 فیصد تک کم کردیتی ہے، امریکی ماہرین

جمعہ 20 اپریل 2018 12:21

کیلی فورنیا۔ (اُردو پوائنٹ اخبار آن لائن۔ جمعہ 20 اپریل 2018ء) امریکا کے ماہرین صحت نے کہا ہے کہ چائے آنکھوں میںموتیا (گلوکوما) کے خطرے کو 74 فیصد تک کم کردیتی ہے۔ یونیورسٹی آف کیلی فورنیاکے شعبہ صحت میں کی گئی تحقیق میں 10 ہزار سے زیادہ افراد کی خوراک اور ان کی صحت کی صورتحال کا ایک طویل عرصے تک جائزہ لیا گیا اور ان میں سے 1678 افراد کی آنکھوں کا معائنہ بھی کیا گیا جس کے بعد ماہرین اس نتیجے پر پہنچے کہ چائے پینے اور موتیا کے درمیان گہرا تعلق ہوتا ہے ۔

(جاری ہے)

موتیا’’ گلوکوما‘‘ کے مرض میں آنکھ کے اندر دھیرے دھیرے دباؤ بڑھتا ہے جو خون کی رگوں کو متاثر کرتا ہے بعدازاں بصارت متاثر ہونا شروع ہو جاتی ہے آہستہ آہستہ دیکھنے کی صلاحیت مکمل طور پر ختم کردیتی ہے اور مریض مکمل طور پر اندھا ہوجاتا ہے۔ ماہرین کے مطابق پوری دنیا میں نابینا پن کی یہ سب سے بڑی وجہ بھی ہے۔ چائے میں اینٹی اکسیڈنٹس اور سوزش دور کرنے والے اجزا موجود ہوتے ہیں جو آنکھوں کو اس خطرناک مرض سے بچاتے ہیں جبکہ روزانہ چائے پینے سے بینائی چھیننے والی اس بیماری کا خطرہ 74 فیصد تک کم ہوجاتا ہے۔