پی ٹی آئی رہنماء اداکارسید ساجد حسن نے پارٹی بدل لی

اتوار 22 اپریل 2018 21:12

کراچی (اُردو پوائنٹ اخبار آن لائن۔ اتوار 22 اپریل 2018ء): تحریک انصاف کے رہنماء اور اداکار سید ساجد حسن نے پیپلزپارٹی میں شمولیت کا اعلان کردیا ہے،پیپلزپارٹی کی قیادت نے ان کی شمولیت کا خیرمقدم کیا ہے۔میڈیا رپورٹس کے مطابق معروف اداکار ساجد حسن نے اہلیہ اور بھائی سمیت دیگر افراد کے ساتھ پاکستان پیپلزپارٹی میں شمولیت اختیار کرلی ہے۔

سینئر رہنما نثارکھوڑو کا کہنا ہے کہ سندھ میں مزید بہترکام کرکے دکھائیں گے۔

(جاری ہے)

پاکستان پیپلز پارٹی کی جانب سے کراچی میں معروف فنکاروں کی پارٹی میں شمولیت کے موقع پر پریس کانفرنس کا انعقاد کیا گیا۔ پریس کانفرنس سے خطاب کرتے ہوئے نثار کھوڑو نے کہا کہ بلاول بھٹو کی جدوجہد سے نئے لوگ پارٹی میں شامل ہورہے ہیں۔انہوں نے کہا کہ اب نواز لیگ شین لیگ بن گئی ہے۔اس موقع پر اداکار ساجد حسن نے کہا کہ وہ بے نظیر بھٹو شہید کے مداح ہیں۔ قوم کو کوئی چیز آگے لے جاسکتی ہے تو وہ لبرل پروگریسو فلسفہ ہے جس میں اقلیتوں کا خیال رکھا جاتا ہے۔ اور کوئی نوجوان لیڈر جو پاکستان کو آگے لے جاسکتا ہے تو وہ بلاول بھٹو ہیں۔