پاک ، بھارت ڈی جی ایم اوز کا ہاٹ لائن پر رابطہ، فائر بندی معاہدے کی خلاف ورزی کا معاملہ اٹھایا ، آئی ایس پی آر

بھارت الزام تراشی کی بجائے اپنا قبلہ درست کرے ،دیر پا امن کیلئے ایل او سی ،ورکنگ بائونڈری پر سیز فائر معاہدوں کی پابندی کرے، بیان

ہفتہ 28 اپریل 2018 23:10

راولپنڈی (اُردو پوائنٹ اخبار آن لائن۔ ہفتہ 28 اپریل 2018ء) ڈائریکٹر جنرل ملٹری آپریشنز (ڈی جی ایم او )پاکستان نے شہری آبادی کو نشانہ بنانے کا معاملہ ڈی جی ایم او بھارت کیساتھ اٹھاتے ہوئے کہا ہے کہ بھارت الزام تراشی کی بجائے اپنا قبلہ درست کرے اور دیر پا امن کیلئے ایل او سی اور ورکنگ بائونڈری پر سیز فائر معاہدوں کی پابندی کرے۔

(جاری ہے)

ہفتہ کو آئی ایس پی آر کی جانب سے جاری بیان کے مطابق پاکستان کے ڈائریکٹر جنرل ملٹری آپریشنز نے بھارت کے ڈی جی ایم او کے ساتھ ہاٹ لائن پر رابطہ کیا اور فائر بندی معاہدے کی خلاف ورزی کا معاملہ اٹھایا۔ ڈی جی ایم او پاکستان نے شہری آبادی کو نشانہ بنانے کا معاملہ بھی اٹھایا۔ رواں سال اب تک بھارتی فائرنگ سے 219 معصوم شہری شہید ہو چکے ہیں، ان شہداء میں 112 خواتین اور 20 بجے شامل ہیں۔ ڈی جی ایم او پاکستان نے کہا کہ بھارت کے ایسے غیر پیشہ وارانہ اور غیر اخلاقی اقدامات امن کی راہ میں رکاوٹ ہیں۔ انہوں نے کہاکہ بھارت الزام تراشی کی بجائے اپنا قبلہ درست کرے اور دیر پا امن کیلئے ایل او سی اور ورکنگ بائونڈری پر سیز فائر معاہدوں کی پابندی کرے۔