آرمی چیف نے پاک افغان سرحد پر بلوچستان پنچ پائی کے مقام پر آہنی باڑ کا افتتاح کردیا

قانون کی پاسداری یقینی بنانا ہر کسی کیلئے ضروری ہے، پاک فوج اپنی آئینی ذمہ داریاں پوری کرتے ہوئے ملک کا دفاع کریگی،جنرل قمر جاوید باجوہ سیف سٹی پراجیکٹ سے کوئٹہ میں امن وامان کی صورتحال میں مزید بہتری آئیگی،پاک فوج بلوچستان میں تعلیم ، صحت ، بجلی ، پانی کی فراہمی کے حکومتی اقدامات کی حمایت کرتی ہے،نہیں چاہتے بلوچستان کسی مخصوص کوٹے یا پیکیج کی مرہون منت ہو،چند عناصر نوجوان نسل کے ذہنوں پر اثرانداز ہو کر انتشار پھیلانا چاہتے ہیں، نوجوان نسل محنت اور کردار سازی سے ملکی ترقی میں کردار ادا کرے،قبائلی عمائدین، مقامی افراد ، مختلف یونیورسٹیز کے طلباء سے گفتگو

منگل 8 مئی 2018 23:26

راولپنڈی (اُردو پوائنٹ اخبار آن لائن۔ منگل 8 مئی 2018ء) چیف آف آرمی سٹاف جنرل قمر جاوید باجوہ نے پاک افغان سرحد پر بلوچستان پنچ پائی کے مقام پر آہنی باڑ کا افتتاح کرتے ہوئے کہا ہے کہ قانون کی پاسداری یقینی بنانا ہر کسی کے لئے ضروری ہے، پاک فوج اپنی آئینی ذمہ داریاں پوری کرتے ہوئے ملک کا دفاع کرے گی،سیف سٹی پراجیکٹ سے کوئٹہ میں امن وامان کی صورتحال میں مزید بہتری آئیگی،پاک فوج بلوچستان میں تعلیم ، صحت ، بجلی ، پانی کی فراہمی کے حکومتی اقدامات کی حمایت کرتی ہے،نہیں چاہتے بلوچستان کسی مخصوص کوٹے یا پیکیج کی مرہون منت ہو،چند عناصر نوجوان نسل کے ذہنوں پر اثرانداز ہو کر انتشار پھیلانا چاہتے ہیں، نوجوان نسل محنت اور کردار سازی سے ملکی ترقی میں کردار ادا کرے۔

(جاری ہے)

منگل کو آئی ایس پی آر کے مطابق آرمی چیف جنرل قمر جاوید باجوہ نے پاک افغان سرحد پر بلوچستان پنچ پائی کے مقام پر آہنی باڑ کے کام کا افتتاح کیا۔ اس موقع پر آرمی چیف جنرل قمر جاوید باجوہ نے قبائلی عمائدین اور مقامی افراد سے گفتگو بھی کی۔ آئی ایس پی آر کے مطابق آرمی چیف جنرل قمر جاوید باجوہ نے آہنی باڑ کی تنصیب میں تعاون وحمایت پر قبائلی عمائدین کا شکریہ اداکیا۔

آرمی چیف نے کہا کہ پاک افغان بارڈر پر باڑ سے دہشت گردوں کی نقل وحرکت پر نظر رکھی جاسکے گی۔ آئی ایس پی آر کے مطابق قانونی نقل وحرکت کیلئے مخصوص کراسنگ پوائنٹ رکھے گئے ہیں جبکہ دو طرفہ اقتصادی سرگرمیوں سے متعلق بھی خصوصی انتظامات کئے گئے ہیں۔ آرمی چیف نے سیکیورٹی صورتحال برقرار رکھنے میں قبائلی عمائدین کا شکریہ ادا کیا ۔ آئی ایس پی آر کے مطابق آرمی چیف جنرل قمر جاوید باجوہ نے کوئٹہ سیف سٹی پراجیکٹ کا بھی افتتاح کیا۔

آئی ایس پی آر کے مطابق کوئٹہ سیف سٹی پراجیکٹ گزشتہ پانچ سال سے رکا ہوا تھا ۔ بیان میں کہا گیا ہے کہ سیف سٹی پراجیکٹ سے کوئٹہ مزید محفوظ ہوگا۔ سیف سٹی پراجیکٹ سے کوئٹہ میں امن وامان کی صورتحال میں مزید بہتری آئیگی۔ آئی ایس پی آر کے مطابق آرمی چیف جنرل قمرجاوید باجوہ نے کوئٹہ میں مختلف یونیورسٹیوں کے طلباء سے بھی ملاقات کی اس موقع پر بات چیت کرتے ہوئے آرمی چیف نے کہا کہ پاک فوج بلوچستان میں تعلیم ، صحت ، بجلی ، پانی کی فراہمی کے حکومتی اقدامات کی حمایت کرتی ہے۔

آرمی چیف نے کہا کہ ہم نہیں چاہتے کہ بلوچستان کسی مخصوص کوٹے یا پیکیج کی مرہون منت ہو۔ آئی ایس پی آر کے مطابق آرمی چیف جنرل قمر جاوید باجوہ نے وزیراعلی بلوچستان کے خوشحال بلوچستان کیلئے مل کر کام کرنے پر پاک فوج اور ایف سی کا شکریہ ادا کیا ۔ آرمی چیف نے کہا کہ ہر کسی کیلئے ضروری ہے کہ قانون کی پاسداری یقینی بنائے ۔ انہوں نے کہا کہ پاک فوج اپنی آئینی ذمہ داریاں پوری کرتے ہوئے ملک کا دفاع کرے گی۔

انہوں نے کہا کہ آئینی حدود میںرہتے ہوئے قوانین پر عملدرآمد یقینی بنانا سب کی ذمہ داری ہے۔آرمی چیف نے نوجوان نسل پرزور دیا کہ وہ محنت اور کردار سازی سے ملکی ترقی میں کردار ادا کرے۔ آرمی چیف نے کہا کہ پاکستان نے دہشت گردی کو مسترد کردیا ہے۔مسلح افواج اور عوام کی قربانیوں کے باعث ملک میں دیرپا امن قائم ہوا ۔انہوں نے کہا کہ چند عناصر نوجوان نسل کے ذہنوں پر اثرانداز ہو کر انتشار پھیلانا چاہتے ہیں۔

آئی ایس پی آر کے مطابق آرمی چیف نے کوئٹہ میں نسٹ کے کیمپس کا سنگ بنیاد بھی رکھا۔ آئی ایس پی آر کے مطابق نسٹ کوئٹہ کیمپس پر دو ارب 63 کروڑ روپے لاگت آئیگی۔نجی ٹی وی نے آئی ایس پی آر کے حوالے سے بتایا کہ آرمی چیف نے سوشل میڈیا کے ذریعے نوجوانوں کو ہدف بنانے پر نظر رکھنے کی ہدایت کی اور تصادم اور نفرت کی طرف لے جانیوالوں سے بچنے کو کہا۔ آرمی چیف نے کہا کہ انتہاء پسندی کو اجتماعی طور پر مسترد کیا جائے۔