امر یکہ کا ایران کو طیارے برآمد کرنے کے پرمٹ منسوخ کرنے کا اعلان

آئندہ اقدامات کمپنی پالیسی اور برآمدی قوانین کی مکمل پاسداری کے مطابق ہوں گے،کمپنی کا موقف

بدھ 9 مئی 2018 22:34

واشنگٹن(اُردو پوائنٹ اخبار آن لائن۔ بدھ 9 مئی 2018ء)امریکی وزارت خزانہ ایران کو طیارے برآمد کرنے کے پرمٹ منسوخ کر دے گی،آئندہ اقدامات کمپنی پالیسی اور برآمدات سے متعلق پابندیوںکے قوانین کی مکمل پاسداری کے مطابق ہوں گے۔غیر ملکی میڈیا کے مطابق ایک سینئر امریکی عہدے دار نے بتایا ہے کہ صدر ڈونلڈ ٹرمپ کی جانب سے تہران کے ساتھ جوہری معاہدے سے علاحدگی کے فیصلے کے بعد وزارت خزانہ ایران کو برآمدات سے متعلق اٴْن اجازت ناموں کو منسوخ کر دے گی جو اس وقت شہری ہوابازی کی کمپنیوں کے پاس ہیں۔

وزارت خارجہ کے مذکورہ سینئر عہدے دار نے اپنا نام ظاہر نہ کرنے کی درخواست پر بتایا کہ "پہلے 90 روز کے دوران وزارت خزانہ مخصوص پرمٹس کو منسوخ کر دے گی جو شہری ہوابازی سے متعلق خصوصی اجازت ناموں کی پالیسی کے تحت جاری کیے گئے تھی"۔

(جاری ہے)

انہوں نے مزید بتایا کہ "وزارت خزانہ نجی سیکٹر کی کمپنیوں کے ساتھ رابطے میں رہے گی اور باقاعدہ صورت میں ان پرمٹس کو منسوخ کرنے پر کام کرے گی"۔

دوسری جانب ایئربس کمپنی کا کہنا ہے کہ وہ حرکت میں آنے سے قبل امریکی صدر ڈونلڈ ٹرمپ کے جوہری معاہدے سے دست برداری کے فیصلے پر غور کر رہی ہے۔ کمپنی کے مطابق اس کے لیے وقت درکار ہے اور آئندہ اقدامات کمپنی کی اندرونی پالیسی اور برآمدات سے متعلق پابندیوں اور نگرانی کے قوانین کی مکمل پاسداری کے مطابق ہوں گے۔ایرانی فضائی کمپنی (ایران ایئر) نے 38.3 ارب ڈالر مالیت کے 200 مسافر طیاروں کا آرڈر دیا تھا۔ ان میں 100 طیارے ایئربس سے ، 80 بوئنگ سے اور 20 اے ٹی آر کمپنی سے طلب کیا گئے۔ یہ تمام سمجھوتے امریکی پرمٹس کے مرہون ہیں۔