پاکستان کیخلاف سازشوں میں مصروف امریکا اور بھارت بھی ایک دوسرے کے آمنے سامنے آگئے

امریکا کی اپنے دست راست بھارت کے خلاف ڈبلیو ٹی او میں شکایت ، بھارت نے ’مارکیٹ پرائس سپورٹ‘ کے بارے میں معلومات کم کر کے بتانا ڈبلیو ٹی او قوانین کی خلاف ورزی ہے

جمعہ 11 مئی 2018 18:05

واشنگٹن(اُردو پوائنٹ اخبار آن لائن۔ جمعہ 11 مئی 2018ء)امریکا نے جنوبی ایشیا میں اپنے دست راست بھارت کے خلاف ڈبلیو ٹی او میں شکایت کر دی،بھارت نے ’مارکیٹ پرائس سپورٹ‘ کے بارے میں معلومات کم کر کے بتائی،صریحاً ایسا کرنا عالمی تجارتی تنظیم کے قوانین کی خلاف ورزی ہے۔ غیر ملکی میڈیا کے مطابق امریکا نے عالمی تجارتی تنظیم ’ورلڈ ٹریڈ آرگنائزیشن‘ میں بھارت کے خلاف ایک شکایت درج کرائی ہے۔

امریکا کا کہنا ہے کہ بھارت نے گندم اور چاول کی فصل کے حوالے سے ’مارکیٹ پرائس سپورٹ‘ کے بارے میں معلومات کم کر کے بتائی ہیں۔خبر رساں ادارے اے ایف پی کے مطابق یو ایس ٹریڈ کے نمائندے اور ایگریکلچر ڈیپارٹمنٹ کی طرف سے جاری ہونے والے ایک مشترکہ بیان میں کہا گیا ہے کہ کسی ملک کی طرف سے ایک حد سے زیادہ ’مارکیٹ پرائس سپورٹ‘ یا پھر اسے کم کر کے بتانا عالمی تجارتی تنظیم کے قوانین کی خلاف ورزی ہے۔

(جاری ہے)

اس مشترکہ بیان میں کہا گیا ہے، ’’امریکی تخمینوں سے یہ معلوم ہوا ہے کہ بھارت نے چاول اور گندم کے معاملے میں تجارتی منڈیوں میں قیمتوں کو بحال رکھنے کے لیے جو مالی مدد فراہم کی اس کی قدر کم کر کے بتائی ہے۔‘‘ بیان میں مزید کہا گیا ہے کہ جو مالی مدد فراہم کی گئی ’’وہ اس شرح سے کہیں زیادہ ہے جس کی اجازت ہے۔ورلڈ ٹریڈ آرگنائزیشن کے قوانین کے مطابق تمام رکن ریاستوں کے لیے ضروری ہے کہ وہ ہر سال اس بارے میں رپورٹ اس ادارے کو فراہم کریں کہ ریاستی کمپنیوں کی طرف سے کون کون سی مصنوعات کو درآمد یا برآمد کیا گیا۔

جس کے بعد اس تنظیم کی رٴْکن کوئی بھی دوسری ریاست اگر سمجھتی ہے کہ داخل کرائے گئی معلومات درست نہیں ہے تو پھر وہ ایک جوابی نوٹیفیکشن داخل کرا سکتی ہے۔امریکی حکام نے اپنی شکایت میں پیداوار کی مقدار اور اس کی قدر کے علاوہ کرنسی کے تبادلے میں غلط بیانیوں کی نشاندہی کی ہے۔امریکا کی طرف سے جوابی نوٹیفیکیشن چار مئی کو داخل کرایا گیا اور یہ اس تجارتی تنظیم میں داخل کرایا گیا پہلا جوابی نوٹیفکیشن ہے۔

یو ایس ٹریڈ کے نمائندے رابرٹ لائتھائزر کے مطابق، ’’امریکا اس بات کی توقع کرتا ہے کہ ہمارے تجارتی پارٹنر رپورٹنگ سے متعلق ان ضروریات پر عمل کریں جن پر انہوں نے ورلڈ ٹریڈ آرگنائزیشن میں شامل ہوتے وقت اتفاق کیا تھا۔امریکی وزیر زراعت سونی پیرڈو کے مطابق، ’’بھارت ایک بڑی مارکیٹ کی نمائندگی کرتا ہے اور ہم چاہتے ہیں کہ بھارت میں امریکی مصنوعات کو زیادہ رسائی دی جائے، مگر بھارت کو چاہیے کہ وہ اپنے اقدامات کے بارے میں زیادہ شفافیت اختیار کرے۔اے ایف پی کے مطابق امریکی حکام نے اپنی شکایت میں پیداوار کی مقدار اور اس کی قدر کے علاوہ کرنسی کے تبادلے میں غلط بیانیوں کی نشاندہی کی ہے۔