خواتین کو بہتر سفری سہولیات کی فراہمی انہیں بااختیار بنانے کیلئے کثیر المقاصد اقدامات کا حصہ ہے، پرویز خٹک

جمعہ 11 مئی 2018 23:54

پشاور۔ (اُردو پوائنٹ اخبار آن لائن۔ جمعہ 11 مئی 2018ء)وزیراعلیٰ خیبرپختونخوا پرویز خٹک نے کہا ہے کہ خواتین کو سفر کی موثر اور بہتر سہولیات کی فراہمی خواتین کوبااختیار بنانے کیلئے صوبائی حکومت کی جانب سے کثیر المقاصد اور کئی طرفہ اقدامات کاایک حصہ ہے ۔ان خیالات کااظہار انہوںنے مردان اور ایبٹ آباد کی خواتین کے لئے بہترسفری سہولیات کی فراہمی کے لئے جاپانی حکومت کی جانب سے عطیہ کردہ بسیں حوالے کرنے کی تقریب سے خطاب کرتے ہوئے کیا۔

مذکورہ معاہدے کے نتیجے میں مردان اورایبٹ آباد میں خواتین کیلئے سات سات الگ بسیں چلائی جائیں گی۔ جاپانی سفیر تاکاشی کورائی ،وزیر اعلیٰ کے معاون خصوصی برائے ٹرانسپورٹ شاہ محمد خان وزیر اور خواتین کے حقوق کے لئے کام کرنے والی معروف شخصیات نے بھی اس موقع پر خطاب کیا۔

(جاری ہے)

صوبائی وزراء محمد عاطف خان ،مشتا ق غنی، امتیازشاہد قریشی اوردیگر متعلقہ افسران نے بھی تقریب میں شرکت کی۔

وزیر اعلیٰ نے کہا کہ صوبائی حکومت سے پہلے خواتین قومی دھارے سے باہر تھیں اوران کو بااختیار بنانے سے متعلق ہر چیز سے انکار کیاجاتاتھالیکن صوبائی حکومت نے خواتین کو بے مثال مراعات دے کرخواتین طبقے کو قومی دھارے میںشامل کرنے کاعمل شروع کیا ہے۔جو انصاف پرمبنی معاشرے کے قیام کے لئے بہت ضروری تقاضاہے۔ یہ صرف شروعات ہیں اور ہم خواتین کو بااختیار بنانے کاعمل مستقبل میں بھی جاری رکھیں گے کیونکہ خواتین ہماری آبادی کاایک بڑا حصہ ہیںجن پرہماری نئی نسل کی پرورش کی ذمہ داری بھی ہوتی ہے اس لئے ان کو نظر انداز کرنے کا مطلب ہماری منزل اورخوشحالی کا نقصان ہوگا۔

انہوں نے کہا کہ ان کی حکومت خواتین کو مکمل بااختیار بنانے کے سلسلے میں کسی کو مسائل پیداکرنے کی اجازت نہیں دے گی اوران کی حکومت صوبے کے قلیل وسائل کے اندر ہرایک کوانصاف کی فراہمی کے لئے تمام ممکن اقدامات کرے گی جبکہ ہماری حکومت نے عوامی خواہشات اورامنگو ں کے مطابق طرز حکمرانی کے تمام ڈھانچے کو تبدیل کر تے ہوئے سرکاری اداروں کو سیاست سے پاک کردیاہے۔

پرویز خٹک نے صوبہ خیبرپختونخوا میںمختلف عوامی پروگرام شروع کرنے پر جاپانی حکومت کی فیاضی وسخاوت کو سراہتے ہوئے کہاکہ جاپان کی حکومت اور عوام کی جانب سے کھلے دل کے ساتھ اس معاونت اور سپورٹ پرہم تہہ دل سے ان کے مشکور ہیں۔ وزیر اعلیٰ نے یقین دلایاکہ خواتین کو بہتر سفری سہولیات کی فراہمی کااقدام ابتدائی طورپر ڈویژنل ہیڈکوارٹر سے شروع کیاگیاہے جس کادائرہ صوبہ بھر کے مزید اضلاع تک پھیلادیاجائے گا۔