کمپوٹرکی غلطی نے شہری کی جان لے لی، بجلی بل زیادہ آنے پر خود کشی

بھارتی شہری نے خودکشی سے قبل ایک خط بھی چھوڑا،غلطی کے ذمہ داروں کے خلاف کارروائی شروع کردی،حکام

ہفتہ 12 مئی 2018 14:53

ممبئی(اُردو پوائنٹ اخبار آن لائن۔ ہفتہ 12 مئی 2018ء) بھارتی ریاست مہاراشٹرا کے شہری نے بجلی کا آٹھ لاکھ روپے سے زائد کا بل آنے پر خود کشی کرلی۔بھارتی میڈیا کے مطابق بھارت کی ریاست مہاراشٹرا کے علاقے اورنگ آباد میں جگن ناتھ نیہا جی شیلکے نامی شخص نے پھندا لگا کر خود کشی کرلی۔ شہری کی لاش کے قریب ایک خط ملا جس میں خود کشی کی وجہ بجلی کا زائد بل اور بجلی کی تقسیم کار کمپنی کا ہتک آمیز رویہ بتائی گئی ہے۔

(جاری ہے)

شہری کو مارچ 2018 کا بل 8 لاکھ 64 ہزار روپے کا موصول ہوا تھا۔بھارتی شہری کے خاندان نے بھارتی میڈیا کو بتایا کہ جگن ناتھ سبزی فروش ہے جس کی آمدنی نہایت قلیل ہے ،دوسری جانب بجلی کی تقسیم کار کمپنی کے حکام کا کہناتھا کہ جگن ناتھ کا بل عددی غلطی کے باعث زیادہ آیا تھا جسے درست کر لیا گیا۔ شہری کا اصل بل 2800 روپے ہے۔ اس لیے شہری کی خودکشی کو کمپنی کے رویے اور زائد بل سے جوڑنا بالکل مناسب عمل نہیں ہے۔ کمپنی نے بل میں غلطی کے ذمہ داروں کا تعین کر کے تادیبی کارروائی کا آغاز کردیا ہے۔