ٹرین 25 سیکنڈ مقررہ وقت سے پہلے روانہ کرنے پر جاپانی کمپنی کی معذرت

ریل گاڑی کی قبل از وقت روانگی کی وجہ ریل گاڑی کے عہدیدار کی غلط فہمی بتائی جا رہی ہے،کمپنی کا بیان

بدھ 16 مئی 2018 16:40

ٹوکیو(اُردو پوائنٹ اخبار آن لائن۔ بدھ 16 مئی 2018ء)جاپان میں ریلوے کے نظام کو دنیا کا سب سے معیاری اور بہترین نظام قرار دیا جاتا ہے۔ اس کی دیگر خوبیوں کے ساتھ وقت مقررہ پر ریل گاڑیوں کی آمد ورفت بھی ہے، مگر حال ہی میں ایک ریل گاڑی اپنے وقت مقررہ سے 25 سکینڈ پہلے روانہ ہوئی تو اس پر ریلوے کمپنی جی ویسٹ کو عوام سے معذرت کرنا پڑی ہے۔

غیرملکی خبررساں ادارے کے مطابق جی ویسٹ کی طرف سے جاری کردہ ایک بیان میں کہا گیا کہ کمپنی اپنے گاہکوں اور سواریوں کو ریل گاڑی پچیس سیکنڈ قبل روانہ کرنے پیش آنے والی مشکل پر معذرت طلب کرتی ہے۔ریل گاڑی کی قبل از وقت روانگی کی وجہ ریل گاڑی کے عہدیدار کی غلط فہمی بتائی جا رہی ہے۔ گاڑی کے حکام نے سمجھا کہ پلیٹ فارم سے گاڑی کی روانگی کا وقت 7:11 ہے۔

(جاری ہے)

انہوں نے تمام بوگیوں کے دروازے اس وقت بند کر دیے جب دیکھا کہ پلیٹ فارم پر کوئی بھی مسافر ٹرین کے قریب کھڑا دکھائی نہیں دے رہا۔جی ویسٹ کمپنی کی ریل گاڑی کی ھیوگو شہر کے نیشی اکاشی ریلوے اسٹیشن سے روانگی کا وقت 7:12 بجے دن تھا مگر گاڑی آدھا منٹ سے چند سیکنڈ پہلے ہی روانہ ہو گئی۔جاپان میں ریل گاڑیوں کی آمد ورفت کو پوری دنیا میں نمونے کے طورپر پیش کیا جاتا ہے جہاں کوئی بھی ریل گاڑی دس سکینڈز سے زیادہ تاخیر کا شکار نہیں ہوتی۔