ٹرمپ کاشمالی کوریا کے سربراہ کم سے 12جون کو سنگاپورمیں طے ملاقات منسوخ کرنے کا عندیہ

امریکہ ملاقات سے قبل کچھ شرائط پر عمل درآمد چاہتا ہے ،امید ہے شمالی کوریا ان شرائط کو پورا کرنے پر آمادہ ہوجائے گا،گفتگو

بدھ 23 مئی 2018 12:31

واشنگٹن ڈی سی(اُردو پوائنٹ اخبار آن لائن۔ بدھ 23 مئی 2018ء)امریکہ کے صدر ڈونلڈ ٹرمپ نے عندیہ دیا ہے کہ شمالی کوریا کے سربراہ کم جونگ ان سے آئندہ ماہ ان کی طے شدہ ملاقات موخر ہوسکتی ہے۔غیرملکی خبررساں ادارے کے مطابق وائٹ ہاوس میں جنوبی کوریا کے صدر مون جائے ان کے ساتھ ملاقات کے بعد صحافیوں سے گفتگو کرتے ہوئے صدر ٹرمپ نے کہا کہ سربراہی ملاقات شاید طے شدہ شیڈول کے مطابق 12 جون کو نہ ہوسکے۔

انہوں نے کہا کہ اگر کم جونگ ان سے ان کی ملاقات 12 جون کو نہ ہوئی تو شاید یہ آگے کسی وقت ہو۔ لیکن ساتھ ہی صدر ٹرمپ نے امید ظاہر کی کہ قوی امکان ہے کہ امریکہ اور شمالی کوریا کے سربراہان کے درمیان یہ ملاقات ضرور ہوگی۔انہوں نے سربراہی ملاقات سے قبل امریکی اور شمالی کورین حکام کے درمیان ہونے والے رابطوں اور ابتدائی بات چیت کو بھی اچھا تجربہ قرار دیا۔

(جاری ہے)

صحافیوں سے گفتگو میں امریکی صدر کا کہنا تھا کہ وہ سمجھتے ہیں کہ شمالی کوریا کے سربراہ ان کے ساتھ مجوزہ ملاقات کے بارے میں پوری طرح سنجیدہ ہیں۔انہوں نے کہا کہ امریکہ اس ملاقات سے قبل کچھ شرائط پر عمل درآمد چاہتا ہے اور صدر کے بقول ان کا خیال ہے کہ شمالی کوریا ان شرائط کو پورا کرنے پر آمادہ ہوجائے گا۔شرائط سے متعلق پوچھے گئے ایک سوال کے جواب پر صدر ٹرمپ نے کہا کہ وہ اس کا جواب نہ دینے کو ترجیح دیں گے۔

لیکن ساتھ ہی انہوں نے امریکہ کے اس مو?قف کو دہرایا کہ شمالی کوریا کو اپنے جوہری ہتھیار لازمی ترک کرنا ہوں گے۔صدر ٹرمپ کا کہنا تھا کہ تمام شرائط کا لبِ لباب یہ ہے کہ شمالی کوریا اپنے جوہری ہتھیار ترک کرنے پر آمادہ ہوجائے۔امریکی صدر نے اعتراف کیا کہ ملاقات سے قبل شاید ایسا کرنا فوری طور پر ممکن نہ ہولیکن اس کا حل یہ ہے کہ کم جونگ ان کم از کم اس بات پر راضی ہوجائیں کہ وہ بہت کم مدت میں اپنے جوہری ہتھیار ختم کردیں گے۔

وائٹ ہاوس کے اوول آفس میں صحافیوں سے گفتگو کرتے ہوئے صدر ٹرمپ نے کہا کہ اگر کم جونگ ان ایسا کرنے پر آمادہ ہوگئے تو میں ان کی حفاظت کی ضمانت دیتا ہوں جس سے صدر ٹرمپ کے بقول "وہ یقیناً خوش ہوں گے اور ان کا ملک مالا مال ہوجائے گا۔امریکی صدر نے اپنی گفتگو میں دعویٰ کیا کہ اگر شمالی کوریا کے جوہری ہتھیاروں کے خاتمے سے متعلق کوئی معاہدہ طے پاگیا تو جنوبی کوریا، چین اور جاپان شمالی کوریا کو عظیم ملک بنانے کے لیے وہاں بھاری سرمایہ کاری کرنے پر تیار ہیں۔