سعودی آئل ٹینکرز کو ایرانی میزائل سے نشانہ بنایا گیا،امریکی وزیردفاع

جمعرات 31 مئی 2018 23:49

واشنگٹن(اُردو پوائنٹ اخبار آن لائن۔ جمعرات 31 مئی 2018ء)امریکی وزیر دفاع جیمز میٹس نے کہاہے کہ حوثی ملیشیا نے اپریل میں سعودی آئل ٹینکر پر جو میزائل داغا تھا وہ ایران سے حاصل کیا گیا۔گزشتہ روز میڈیا سے بات چیت کرتے ہوئے امریکی وزیر دفاع جیمز میٹس نے کہا کہ بحر احمر میں جہاز رانی کو درپیش خطرہ اس وقت واضح ہو کر سامنے آ گیا جب یہ دیکھا گیا کہ ایران کے بھیجے ہوئے میزائل نے کس طرح آئل ٹینکر کو نشانہ بنایا۔

(جاری ہے)

یمن میں آئینی حکومت کو سپورٹ کرنے والے عرب اتحاد کے ترجمان کرنل ترکی المالکی کے مطابق حوثیوں کے زیر کنٹرول الحدیدہ بندرگاہ کے مغرب میں عالمی پانی میں سعودی آئل ٹینکر کو حوثی ایرانی حملے کا نشانہ بنایا گیا۔ المالکی نے واضح کیا کہ اتحادی فورسز کے بحری جہازوں کی مداخلت کے بعد حملے کی کوشش ناکام ہو گئی اور آئل ٹینکر کو معمولی نقصان پہنچا۔کرنل المالکی نے زور دے کر کہا کہ یہ دہشت گرد حملہ آبنائے باب المندب اور بحر احمر میں بحری جہاز رانی اور عالمی تجارت کی آزادی کیلئے بڑا خطرہ ہے۔اس کے نتیجے میں ماحولیاتی اور اقتصادی نقصانات بھی ہو سکتے ہیں۔