این اے 59 سے (ن)لیگ کے انجینئرقمرالاسلام نے کاغذات نامزدگی جمع کرادئیے

چوہدری نثار علی خان نے مسلم لیگ ن کے پارلیمانی بورڈ کو ٹکٹ کیلئے سرے سے کوئی درخواست ہی نہیں دی ،ْ الیکشن میں حصہ لینگے

جمعہ 8 جون 2018 00:06

راولپنڈی(اُردو پوائنٹ اخبار آن لائن۔ جمعرات 7 جون 2018ء) این اے 59 سے (ن)لیگ کے انجینئرقمرالاسلام نے کاغذات نامزدگی جمع کرادئیے۔راولپنڈی حلقہ این اے 59 سے (ن) لیگ کے رہنما انجینئر قمر الاسلام نے کاغذات نامزدگی جمع کروا دیئے ہیں ،ْاین اے 59 سے چوہدری نثارعلی خان بھی الیکشن لڑ ینگے ۔مسلم لیگ کے رہنما انجینئر قمر الاسلام نے گزشتہ دنوں پنجاب ہاؤس اسلام آباد میں مسلم لیگ کے قائد میاں محمد نواز شریف سے ملاقات کی تھی اور پارلیمانی بورڈ میں این اے 59 کے ٹکٹ کیلئے درخواست جمع کرائی تھی۔

انجینئر قمر الاسلام پہلے اس علاقے سے رکن پنجاب اسمبلی تھے۔دوسری طرف چوہدری نثار علی خان نے مسلم لیگ ن کے پارلیمانی بورڈ کو ٹکٹ کیلئے سرے سے کوئی درخواست ہی نہیں دی تھی۔

(جاری ہے)

اس سے یہ ظاہر ہوتا ہے کہ چوہدری نثار آزاد حیثیت میں الیکشن لڑنے کا ارادہ رکھتے ہیں۔این اے 59 سے چوہدری نثار کے مقابلے میں تحریک انصاف کے غلام سرور خان اور پاکستان پیپلز پارٹی کے چوہدری کامران اسلم بھی الیکشن میں حصہ لینگے ۔

چوہدری نثار نے اپنی ایک سے زائد پریس کانفرنسز اور انٹرویوز میں نواز شریف اور پارٹی کو تنقید کا نشانہ بنایا۔ گزشتہ دنوں شہباز شریف نے بھی کہا تھا کہ چوہدری نثار میں بچپنا ہے اور بچے کو منانا پڑتا ہے۔شہباز شریف کی اس بات کا چوہدری نثار نے کافی برا مناتے ہوئے سخت ردعمل دیتے ہوئے کہا تھا کہ شہباز شریف کو بچپنے اور سنجیدہ عمل میں فرق کا احساس ہی نہیں، بچپنا وہ عمل ہے جو ان کی پارٹی قیادت اس وقت روا رکھے ہوئے ہے جبکہ غیر سنجیدگی یہ ہے کہ بطور پارٹی صدر وہ اس کے مداوے کیلئے کچھ نہیں کر پا رہے۔