کوئٹہ میں بارش سے ندی نالوں میں طغیانی، راولپنڈی، اسلام آباد میں مزید بارش کی پیشگوئی

مردان، کوہاٹ، ہزارہ، راولپنڈی،گوجرانوالہ، لاہور ‘کشمیر اور گلگت بلتستان میں گرج چمک کے ساتھ مزید بارش کا امکان

پیر 18 جون 2018 11:40

اسلام آباد/‘کوئٹہ‘مردان (اُردو پوائنٹ اخبارتازہ ترین - آئی این پی۔ 18 جون2018ء) بلوچستان کے دارالحکومت کوئٹہ کے قریب ہرنائی و گردونواح اور پہاڑی سلسلوں میں بارش کے باعث ندی نالوں میں طغیانی آگئی۔ طغیانی کے باعث ہرنائی، پنجاب قومی شاہراہ پر تین مقامات پر ٹریفک کی آمدورفت معطل ہوگئی،ٹریفک کی معطلی سے مسافروں اور ٹرانسپورٹرز کو مشکلات کا سامنا کرنا پڑا۔

دوسری جانب محکمہ موسمیات نے مردان، کوہاٹ، ہزارہ، راولپنڈی،گوجرانوالہ، لاہور ڈویڑن، اسلام آباد، کشمیر اور گلگت بلتستان میں بھی چند مقامات پر گرج چمک کے ساتھ مزید بارش کی پیشگوئی کی ہے۔ اس سے قبل ملک کے مختلف شہروں میں تیز بارش کے نتیجے میں موسم خوشگوار اور عید کی خوشیاں دو بالا ہو گئیں۔عید کے تیسرے روز ساہیوال، خوشاب، نورپور تھل، دریاخان، ہارون آباد، بہاول پور، چشتیاں، فورٹ عباس، اوچ شریف، ڈونگہ بونگہ، کندیاں، شجاع آباد، سکندر آباد، بہاولنگر میں تیز ہوا کے ساتھ شدید بارش ہوئی جس سے گرمی کی شدت کم ہوگئی۔

(جاری ہے)

پشاور میں بھی آندھی اور گرج چمک کے ساتھ تیز بارش ہوئی۔تیز بارش سے موسم تو خوشگوار ہو گیا تاہم کچی آبادیوں کیلئے رحمت زحمت بن گئی اور ناقص سیوریج نظام کی وجہ سے نشیبی علاقے زیر آب آگئے۔ کئی علاقوں میں بارش ہوتے ہی بجلی کی آنکھ مچولی بھی شروع ہوگئی۔ادھر عید کی تعطیلات کے آخری روز سیاحوں کی بڑی تعداد نے بالائی علاقوں کا رخ کرلیا۔ بالاکوٹ، ناران، جھیل سیف الملوک اور دیگر مقامات پر سیاحوں کا رش لگ گیا۔ادھر کراچی میں گرمی برقرار ہے اور محکمہ موسمیات نے کہا ہے کہ شہر میں بارش اور بوندا باندی کا امکان فی الحال ختم ہوگیا ہے۔ پیر کو کراچی میں ہوا میں نمی کا تناسب 57 فیصد اور سمندری ہواؤں کی رفتار 25 کلومیٹر فی گھنٹہ ریکارڈ کی گئی۔